Ayubu 39 - KITABU KITAKATIFU

¹ “Wamanya lwi zimburi ziu mu vigulu ziivulaa? Wahenzeriza ku zimbongo niziivulaa?

² Umanyi ing'inga ya zimalaa ku ziivulaa? Umanyi ing'inga ya ziivulaa?

³ Umanyi lwa naziname hasi nukwiivura avana vazio ku lirova?

⁴ Avana vazio vanyoola zinguru vulahi, vavirukaa nizinguru mwigendanyama; na siviirana mba.

⁵ “Nivwaha waha zibunda ziumuvulimu ovovoholore vwazio? Nivwaha wazivoholola nukuzileka zivoyavoye?

⁶ Ndaaziha changalangwe kuva yengo wazio, kandi ndazileka zimenye ku vilelemo viejumbi.

⁷ Zielehaa ihale kutura ku madaala manene giliyoga, na siali ho numulala unyala kuzituga nukuzikola ziyinziri.

⁸ Ivigulu viveeye vwayiru wa ziayaa, uwa zienyelerizaa kindu choosi ikivisi ziduuki kulia.

⁹ “Embongo yumbulimu ilavugilira kukutumikira? Inyala kuvugilira kogona mu kego chicho vudiku?

¹⁰ Unyala kovoha embongo nulufunu nokogekola ilimi mulimi? Anoho kugekola ing'use ligembe liu kulima milimi jijo?

¹¹ Unyala kugisuuvira kigira zinguru ziayo ziveeye zinyingi? Unyala kugelekela miyinzi jijo miliduhu ekokolere?

¹² Ulagisuuvira ekoleetere ligesa liilio mu mavikiru nukuvungiza vuswage vuvwo kuloze lulwo?

¹³ “Zimbaha zie livuudu zikubaganaa vwanguvwangu; Navuzwa sinyala kuburuka kuli ling'oani mba.

¹⁴ Livuudu lilekaa mavuyu gayo ku marova, kunangwa gaduuki konyoora uluuya mu marova.

¹⁵ Navuzwa simanyi niiva ganyala kuduvagwa, anoho inyama yumuvulimu inyala kugaatanyia mba.

¹⁶ Livuudu likolera vana valio uvudamanu kuli sivaveeye valio mba. Kali miyinzi jayo nijoneka, siagihendera mwoyo mba.

¹⁷ Yaali inzi Nyasaye, uwavula kugiha ovogeri; kandi sindagiha limanyiriza mba.

¹⁸ Navuzwa lwa itangaa kunyagula, esekelizaa kali ibarasi na uyo unini kuyo.

¹⁹ “Ayubu, ni ivi waaha zibarasi zinguru ziazio? Ni ivi wavika zisuywa ku magoti gazio?

²⁰ Ni ivi wazilomba zitumatumi kuli zisigi? Lisiala liu muulu gazio litihiza vandu.

²¹ Zikutakutaa hasi mu mavoona zinyagulira hu vulwani voveeye nizinguru ziazio ziosi.

²² Zibarasi si zimanyirizaa ikivuni chu vuti mba, kandi kivavi sikinyala kuziilanyia inyima mba.

²³ Iviuma via avanini vazio vagingi, vikubaganaa vudinyu nokong'ereng'ana mu liuva.

²⁴ Zibarasi ziesunda imbiri, zidegera nuvuti; lwi kisiriva kikubaa, sizinyala kusingira kali machiriri mba.

²⁵ Vuli ing'inga, lwi kisiriva kikubangwa, zivoolaa, Aha! Zifunyiriza uvulwani kali nizikikiri ihale, kandi zihulira vanene nivahanzuka kuhaana malago.

²⁶ “Iliive liega kutura ku ivi kuli linyala kuburuka, lwa livambulaa zimbaha zialio kohenza Isavaalu?

²⁷ Indizu ibulukaa igulu ku lilaga liilio, nukwumbaka inyumba yalio igulu mu vigulu?

²⁸ Elombaa vomenyo vwayo igulu ku zinyanda zindambi kandi elombaa zindongozi zinzugi zie zinyanda kuva imbinga yayo.

²⁹ Kutura kwene yikwo ehenzaa himbi nihale. Iduuki konyoora ikindu chukwita nukulia.

³⁰ Avana vayo vanuuna masahi; kandi hi miviri mikuzu jiveeye niho hi zindizu ziveeye.”