Ayubu 38 - KITABU KITAKATIFU

Yahova ativuliraa Ayubu 38:1—42:6

¹ Maku Yahova yativulira Ayubu kutura mu kiihi kenene navoora,

² “Ivi oveeye vwaha uhing'anaa ni zing'anagani ziange na makuva gataveeye mu ni limanyiriza?

³ Singira vudinyu kuli musaza, na uhaane mativuli ku mateeva ga ngoteva.

⁴ Ivi waali haliha lwa ndalomba lirova? Mbolera niiva oveeye ni limanya linene.

⁵ Nivwaha walaga kuli ovonene vwalio vunyala kuva? Nivwaha wanyiira mugoye okogera lirova? Ivi wamanya mativuli goosi?

⁶ Ni kindiki kigumira zitiru ziasingiriza mise ji lirova? Kandi nivwaha wavika ligina liu mukoona lie lirova?

⁷ Mu mavwevwe ku lidiku yilio zing'ereng'ani ziembaa harara, kandi vilombe viu mwigulu vihanzuka mu vusangali.

⁸ Nivwaha wahaana virivwa kwigalira inyanza yizuuyi, lwa mazi gafudula kutura musi mwi lirova?

⁹ Yaali inzi wakunika inyanza na malesi kandi ndagikumbiriza ni kisundi kenene.

¹⁰ Ndaalombera inyanza zinzako, kandi ningihanira inyima wi miliango ni miluguyu,

¹¹ ndaagevoolera, ‘Ivi inyanza hamba hano, na si ulavita ahene yaaha mba! Viguvuli vivio vie zinguru kuduuka vigalirwi hano.’

¹² “Ayubu, waalagaku iliicha liumugamba mu limenya liilio liosi?

¹³ Walaga ku iliicha liu mugamba kugumira lirova, nu kusung'usa avadamanu kutura havundu haavo hukwivisa?

¹⁴ Vulavu vwi lidiku volomba vigulu na mavoona kololeka kuli lielingalinga lie inguvu, vilolekaa vulahi kuli ilimiina liu muhuri ko ovodohi.

¹⁵ Uvulavu vwi lidiku voveeye uvulavu vonenene ku vadamanu, kandi vuvigaliraa kokora kirage.

¹⁶ “Ivi wayingira ku musi mwi visenukiru vie inyanza? Wagenda ku kulwaalo lwi inyanza?

¹⁷ Ivi wamanywa ku virivwa vie likuza? Anoho, walola ku virivwa vie kivala cha vakuzu?

¹⁸ Ivi wamanya ovonene vwi lirova yili? Undivuliri niiva umanyi.

¹⁹ “Ivi umanyi wu vulavu vutura? Anoho ivi umanyi wi kisundi kitulaa?

²⁰ Unyala kuvimanya wa viduukana vizie, kandi uvimanyie yengo wa viduukana viirane?

²¹ Mbeeye ni lisuuvira ndi ivi umanya, kandi oveeye muhindira ligali na kandi waaliho lwi kivala cha lombwa!

²² “Wayingira ku mu zinyumba zia mavikiru gi likonza. Anoho walola ku mavikiru ga magina gi imbura?

²³ Inzi ndaaviviika vietegekere ing'inga yu vudinyu vuduuka, kandi kigira ing'inga yu kukubana kandi yu kulwaana.

²⁴ Inzira izizaa havundu hi liuva litulaa eveeye haliha? Anoho, imbuza yi kiihi kutura Ivugwi ihuuzaa kutura haliha?

²⁵ “Nivwaha walomba inzira yi imbura elondaa mu? Nivwaha walomba inzira yinguba ihiriganaa elondaa ku?

²⁶ Nivwaha oleeta imbura ku kivala humundu ataveeye? Nivwaha okolaa imbura kukuba mu changalangwi mwa vandu vatamenyi?

²⁷ Nivwaha usamaa mazi ku kivala chumu, kunangwa uvulimu vomere ku marova?

²⁸ Imbura eveeye na baba, anoho nivwaha wiivula zingeregeriza zie lime?

²⁹ Amagina gi imbura gaturaa munda mwa vwaha? Kandi nivwaha wiivula lime lio vukindu vwu mwigulu?

³⁰ Amazi gagwizaa madinyu kuli ligina, kandi kwigulu kwinyanza kudinyiranaa.

³¹ “Unyala kovoha harara zing'ereng'ani zilangwa ‘Pleiadesi’, anoho kodendeyiza vivohero vie zing'ereng'ani zilangwa Orioni?

³² Ivi unyala kwimilira zing'ereng'ani zilangangwa ‘Mazarozi’ mu ing'inga yazio, anoho unyala kwimilira zing'ereng'ani zilangwa Beari harara na vana vazio?

³³ Ivi wamanya malago gamiihaa vilombe viu mwigulu? Unyala kokora amalago yaga gamiihi ku vilombe viu mu lirova?

³⁴ “Unyala kuhanzukira amalesi, nukugalaga gakukuniki ni imbura enene?

³⁵ Unyala kulaga zimbeni zizie kohemahema ihale, zilaza ku ivi nokovoora, ‘Koveeye hano?’

³⁶ Nivwaha wavoolera ‘Ibisi’ wu mwigulu ndi mugera gwa Naili gwizuuyi? Kandi nivwaha wavoolera idaywa ndi imbura ilakuba?

³⁷ Nivwaha oveeye no vogeri uvunyala kuvaliza malesi? Kandi nivwaha unyala kuginaminya gakubizi imbura?

³⁸ Kunangwa imbura ekole luguchi ludinyirane, na amadohi gagumirane?

³⁹ “Unyala kuhimila isimba inyama, anoho unyala kwigutiza zisimba zisoleri lwa ziveeye ninzara,

⁴⁰ lwa zievisaa muzimbangaywa ziazio, anoho lwa zigonaa mu vulimu okogoneka chukuhima?

⁴¹ Nivwaha uhaanaa viukulia ku majikoro, lwi viminyu viago vililira inzi, nokovoyavoya kwenya chavilia?”