Ayubu 37 - KITABU KITAKATIFU

¹ “Liiva yili lilombaa mwoyo gwange kukubaganaa vudinyu mu inzi, ma gutulaa mu vogono vwagwo.

² Muhuliri munyi mwosi lihirigana liu mwoyo gwa Nyasaye, kandi liatuluruka kuli lienguba litulaa mu munwa gwigwe.

³ Atumaa loheni luviti vugita muvwerefu; kutura lovega lulala lwi lirova kuduuka ku lundi.

⁴ Maku lihuuma liu mwoyo gwigwe lihulirikaa. Mwoyo gwu luyali lwilwe gwatulurukaa, kandi loheni lohemahemaa.

⁵ Ku lilaga lia Nyasaye ivindu viokogenyia viekoleka, vindu viukuhuga via kunyi kutamanyiriza viekoleka.

⁶ Avooreraa likonza, gwa ku lirova! Kandi avolera lunyilira ni imbura, Kuba ni zinguru ligali.

⁷ Asingilizaa vuli mundu kutura ku miyinzi jije; kunangwa avandu vosi vaduuki kumanya miyinzi jije.

⁸ Maku zinyama ziumbulimu ziranaa ahukwivisa hazio, nukutigara mu zimbangaywa mwazio.

⁹ Zimbuza zie kiihi ziza kutura isavaalu, nuvukindu vululu navwo vuturaa Ivaale.

¹⁰ Mwika gwa Nyasaye gokolaa mazi kugwa kuli ligina kandi gugirung'anyiaa mazi kugwa kuli ligina lidinyu.

¹¹ Adwikaa malesi maliduhu musigo gwa mazi, amalesi gasalanyia loheni lwilwe.

¹² Ku lilago lilie, viosi vivodong'anaa nokogenda yiyi ni yiyi. Kandi gatwekizaa vindu viosi via Nyasaye alaangaa viekoleke.

¹³ Nyasaye atumaa imbura kusama lirova; anyala kugituma kuhaana amageri ku vandu, anoho kuvamanyia vuyanzi vwivwe.

¹⁴ “Ayubu, kiring'ana hakekeke; uganagane ku agokogenyia ga Nyasaye akolaa.

¹⁵ Ivi umanyi kuli Nyasaye ahaanaa malago geege? Nokokola loheni luhemaheme kutura mu malesi?

¹⁶ Ivi wamanya kuli malesi geremaa muvwerefu? Ivi wamanya miyinzi jokogenyia juvusiza ja Nyasaye?

¹⁷ Awa, ivi unyala kusalira vuzwa nuluuya, lwi imbuza isambaa kutura Isavaalu ihuuzaa ku kivala.

¹⁸ Unyala kokoonya Nyasaye kuvambuula ligulu kandi ulikole live lidinyu kuli kivia kisiyiywi?

¹⁹ Ukwigizi chakovoolera Nyasaye; zing'anagani zietu ziveeye vuzwa mu kisundi, sikoveeye nichakovora mba.

²⁰ Sinyala koteeva molome na Nyasaye mba; kigira ki muhe uvwiyangu vwu kundiviza?

²¹ “Na kalunu uvulavu mwigulu ovong'ereng'anaa; voveeye ovong'ereng'anu ligali kali sikunyala kohenza ku mba, kandi imbuza imali kweya malesi kutura mu ligulu.

²² Uvwaku vulahi kuli izahabu vololekaa kutura ivaale, Nyasaye umali kuvikwa vukumi vwukutihiza.

²³ Nyasaye Wuvunyali siaveeye wakunyala kuduukila mba, siakudambizaa mu likalaga lilie lirungi mba.

²⁴ Kulwayago, avandu vosi vamutizaa; kandi siahendera mwoyo mundu woosi uganaganaa aveeye mugeri mu liegingira lilie mba.”