Ayubu 36 - KITABU KITAKATIFU

¹ Maku Elihu yaazizagilira kovora:

² “Wikuziri hakekeke, na inzi ndakumanyia; kigira ngikiri ni kindu chambolaa mu vogono vwa Nyasaye.

³ Limanyiriza liange liveeye livambalalu; ndatumikira cha inzi manyi kumanyia ndi Nyasaye, umulombi wange aveeye mulungi.

⁴ Kigira gaveeye agiligali makuva gange sigaveeye ovovehi mba; mulala oveeye muduukiru mu limanya, aveeye hano harara nivi.

⁵ “Henza, Nyasaye aveeye wizingulu, sialegelizaa mundu vosi mba aveeye Wuvunyali ni zinguru zie limanyiriza.

⁶ Sialekaa avoni vazizagiliri kuva mwoyo mba, navuzwa aheezaa avadambizangwa uvulungi vwavo.

⁷ Akingaa yavo avaveeye valungi; avavugiliraa kwamiiha kuli avami, kandi alekaa vahevwe uluyali mihiga ni mihiga.

⁸ Navuzwa niiva vavofwa vudinyu ni minyororo, nukugumirwa mu migoye ji lidambizwa linene,

⁹ hene yaho Nyasaye avamanyia miyinzi jaavo na mahiolo gaavo, kandi avamanyia kuli vaveeye ni liegingira.

¹⁰ ‘Yigulaa amatu gaavo vahuliri amigizu nukuvalaga viirane kutura mu vwoni.’

¹¹ Niiva valahulira Nyasaye nukumutumikira, valagasizwa mumadiku gaavo goosi, kandi mihiga jaavo josi jilava ji liyaanziza ligali.

¹² Navuzwa nivatahulira Nyasaye, valitwa ni kivavi kandi valakuza vugira limanyiriza.

¹³ “Yavo avataveeye na Nyasaye mu mioyo jaavo, vazizagiliraa kuva nu vutima; Kandi kali lwa vahevangwa mageri, sivaniraa ovokonyi mba.

¹⁴ Vakuza vuzwa nivakikiri avasoleri; livamwoyo liavo lifwelaa mu zisoni.

¹⁵ Navuzwa Nyasaye yigizaa vandu kuvitira mu vusaliri vwavo; kandi atumikiraa kivi chavo kuvakola vaduuki kulola.

¹⁶ “Nyasaye yakutuliza mu kivi, nakuviika havundu huvusangali ni mirembe nemesa yooyo yizula viukulia.

¹⁷ Navuzwa kalunu ulahevwa mageri kolondekana nu vudamanu, likalagirwa nuvulungi vikugumiyi.

¹⁸ Ohenze vulahi kandi ogelihi, utaleka iviambeti vikugaade, anoho utaleka uvutugi vukuchaminyi mba.

¹⁹ Uganaganaa lilira liilio lilakokonya kutura mu kivi? Anoho zinguru zizio ziosi zinyala kukokonya utuli mu kivi?

²⁰ Utakayirwa uduuki ing'inga ya vandu vadivizwa mba.

²¹ Ohenze vulahi ogelihi, utagirung'ana kokora uvudamanu mba; oheveywi uvusaliri kukwigalira kokora uvudamanu.

²² “Wizulizi kuli ovonene vwi zinguru zia Nyasaye voveeye; Aveeye mwigizi munene kuvoosi.

²³ Nivwaha unyala kumulohizira zinzira zizie? Anoho nivwaha unyala kovora akoli uvudamanu?

²⁴ Yizominyangwa kazozo ku miyinzi jakola. Ivi kandi kuduuka umwizominye.

²⁵ Avandu vosi vamali kolola miyinzi ja Nyasaye yakola; mundu ajilolaa kutura ihale.

²⁶ Kunyi sikunyala kumanya ligali ovonene vwa Nyasaye; kandi sikunyala kuvaliza mihiga ji livamwoyo lilie mba.

²⁷ “Nyasaye niyie uvugura mazi kuye kutura mu lirova ma agagirung'anyia kugwa zingeregeriza zie imbura.

²⁸ Alekaa imbura ikubaa kutura mu malesi, ma ikubaa ku vandu vosi.

²⁹ Siaveeye ho nu mundu kali mulala umanyi kuli malesi gagendaa, anoho kuli inguba ihiriganaa, kuvitira mu vwerefu, uwa Nyasaye amenyaa.

³⁰ Atumaa oloheni kuvitira mu ligulu liosi, navuzwa luliva lwinyanza lutigala kisundi.

³¹ Yiyi niyio inzira ya alihiziraa mu avandu, kandi ahaanaa kuvo viukulia vinyingi.

³² Agumiraa loheni numukono gwigwe, kandi alaga kukuya havundu hamali kotovola.

³³ Inguba imanyiaa iliiza lie imbura yi kiihi kandi zinyama nazio zimanya ndi imbura yiza.”