Ayubu 35 - KITABU KITAKATIFU

¹ Maku Elihu yaazizagilira komoloma:

² “Uganagana likuva yili nililungi? Ivi ovola, ‘Oveeye mulungi imbiri wa Nyasaye.’ ”

³ Anoho koteeva Nyasaye, “Uvwoni vwange vukohendizira ki mwoyo? Nyooye vukala ki ku livula kokora uvwoni?”

⁴ Ndakayanzi kutivulira ivi harara na valina vovo.

⁵ “Henza igulu mwigulu na olole, kandi olole amalesi gaveeye igulu kuvita ivi!

⁶ Niiva okola uvwoni yago sigasalirizaa Nyasaye mba. Niiva okola uvudamanu, haali kanyingi, yago ganyala kumusaliriza?

⁷ Niiva oveeye mulungi ligali nikindi ki cha uhezaa Nyasaye; anoho Nyasaye anyoora ki kutura ku ivi?

⁸ Vandu vandi vasalira kigira uvwoni vuvwo, kandi uvulahi vwa okolaa vumukonyaa.

⁹ “Lwa vandu vadambizwa, vakenya; valira mbula mundu yavakonya.

¹⁰ Navuzwa sivagirung'ana koyeeka ku Nyasaye mulombi wavo mba; uvaheezaa lisuuvirizwa mu zing'inga ziavo zie kisundi kenene ligali.

¹¹ Sivagirung'ana koyeeka ku Nyasaye okolaa kunyi kuva avageri, avageri ligali kuvita zinyama ziosi anoho manyonyi goosi.

¹² Hene yaho vanira vakonywe, navuzwa Nyasaye siavativuliraa mba, kigira vaveeye avingingili kandi vadamanu.

¹³ Ligali gaveeye vugira vokonyi ku yavo kwanira ku Yahova mbula vakonywe; Nyasaye Wuvunyali siavalolaa, anoho siavahuliraa mba.

¹⁴ “Ayubu, ivi ovola siunyala kolola Nyasaye mba; navuzwa lindiliraa nuvwikuziri ichiina chicho keveeye imbiri weve.

¹⁵ Ivi uganaganaa ndi Nyasaye siahaanaa mageri, Kandi siahenzaa ligali ku vwoni mba.

¹⁶ Ayubu yamoloma makuva gataveeye nikivuni, yameda vuzwa makuva vugira limanya.”