Ayubu 34 - KITABU KITAKATIFU

¹ Maku Elihu yaazizagilira kovora,

² Muhuliri makuva gange, munyi avageri mumbulirize munyi avilimanya.

³ Kigira ugutu gogerizaa makuva, kuli lulimi luzaazamaa chukulia.

⁴ Kunangwa, gendi kotovole agaveeye malungi; leki kumanyirizi harara agaveeye malahi.

⁵ Kigira Ayubu avoora, “Inzi mbeeye vugira imbara, kandi Nyasaye wambakani kumba vulungi vwange.

⁶ Kali nimbeeye mulungi, mbalizangwa kuva umuvehi; kali nindaveeye nuvwoni ingwago yange sieveeye inyala kohona mba.”

⁷ Walola ku mundu woosi kuli mundu uyu, Ayubu? Siamanyiaa uluyali ku Nyasaye mba.

⁸ Ayaanza lisanga lia vandu vadamanu, kandi agendaa harara na voni.

⁹ Avoora, mundu sianyola kindu, lwa agerizaa kokora uvulariri vwa Nyasaye mba.

¹⁰ Mbulirizi, munyi avandu vilimanya linyingi? Nyasaye Wuvunyali anyala kokora agaveeye madamanu?

¹¹ Nyasaye ahaanaa madanyi ku vandu kugavakolaa kandi avakolera kuli gavadukiraa vakolelwe.

¹² Gaveeye agiligali ndi, Nyasaye siakolaa uvudamanu mba. Kandi Wuvunyali sialachaminya likalaga lirungi.

¹³ Nivwaha wamutovola ave nizinguru ku lirova? Kandi nivwaha wamuvika kulinda kivala choosi?

¹⁴ Niiva Nyasaye alirana kuvugura roho weve, kandi niiva alirana kuvugura mwika gwigwe gwi livamwoyo,

¹⁵ maku avandu vosi valakuza, na umundu naye alirana mu luguchi.

¹⁶ Niiva oveeye nilimanyiriza, huliriza ku cha ngovolera.

¹⁷ Ivi ukalagiraa Nyasaye oveeye umulungi? Uganaganaa adunyiraa likalaga lirungi?

¹⁸ Nyasaye akalagira avami na avamihi, lwa vaveeye avatakonya kindu anoho avachamu.

¹⁹ Nyasaye siamanyiaa liyaanzilira ku avami vi vivala anoho kohendera avatugi mwoyo kuvita avadaka mba, kigira yava vosi vaveeye miyinzi ja makono geege.

²⁰ Vakuza vwangu mu vudiku hagati. Nyasaye avaduya ma vakuza; na avizingulu vatulizwa ho vugira zinguru ziu mundu.

²¹ Nyasaye ahenzerizaa zinzira zia vandu, kandi alolaa havundu hoosi aha azizaa.

²² Sihaveeye ho ni kisundi kenene ligali, anoho ichiriri kimwamu ligali, uwa avakoli vuvudamanu vanyara kwivisa mba.

²³ Nyasaye siyaviika ho ing'inga, iya vandu vazia nukukalagirwa harara naye mba.

²⁴ Siaveeye nilienya kutunyiriza nukutulizaho aviimiliri, nukuviika ho avandi mu vogono vwavo mba.

²⁵ Kigira amanya ichavakolaa, avatungaminyaa nukuvaduvulanyia muvudiku.

²⁶ Ahaanaa mageri ku avoni, imbiri wa vandu vosi;

²⁷ kigira vamali koleka kumulonda, kandi vavuli kuhulira malago geege goosi.

²⁸ Kunangwa vaniga avadaka vaaniri ligali ku Nyasaye; naye yahulira lilira liavo kigira kwenya ovokonyi.

²⁹ Lwa Nyasaye akiring'anaa, nivwaha unyala kumudula? Niiva yakavisi mumoni mwimwe, nivwaha wakamuloli? Kali niiva nu mundu ku vosi anoho ihiiri avulaho unyala kumukalagira.

³⁰ Kandi mundu utaveeye wa Nyasaye, sianyala kwamiiha mba. Kandi atatega avandu mba.

³¹ Ayubu, ivi wayiyama uvwoni vwuvwo ku Nyasaye nukulaga siulakola uvwoni kandi mba?

³² Wateeva Nyasaye akumanyie mahiolo googo? Kandi ivi wavugilira koleka likora uvudamanu?

³³ Kigira ivi usulaa aga Nyasaye akolaa, unyala kusuuvira alakola cha ivi wenyaa? Litovola ni liilio, si liveeye liange mba; okovolere kalunu cha uganagana?

³⁴ “Mundu woosi wilimanya alavugilira ligali; na vuli mundu oveeye novogeri uhuliraa inzi alavoora,

³⁵ Ayubu amolomaa vugira limanya; amakuva geege sigali nikivuni mba.

³⁶ Nuuganagana kuvindu viosi ivia Ayubu avoora, ulalola ndi amolomaa kuli mundu mudamanu.

³⁷ Kigira amedaa uvwibaali ku vwoni vwivwe. Ahenyahenyaa Nyasaye imbiri wiitu nokomeda amakuva geege ku Nyasaye.”