Ayubu 33 - KITABU KITAKATIFU

¹ O, Navuzwa kalunu Ayubu, hulira livoora liange; huliriza ligali amakuva gange goosi.

² Mbeeye ahimbi komoloma, lulimi mu munwa gwange lulamoloma.

³ Amakuva gange garandizaa uvulungi vwu mwoyo gwange; kandi inzi manya ndi agamolomaa gaveeye agiligali.

⁴ Roho wa Nyasaye yanomba; numwika gwu Wuvunyali Wanyala Viosi gwaamba livamwoyo.

⁵ Ndivulira niiva unyala, lohiza makuva googo vulahi imbiri wange, yetegeke, usingiri imbiri wange.

⁶ Ivi harara ni inzi kufanana imbiri wa Nyasaye, kwombi kwalombwa kutura ku vodohi.

⁷ Kunangwa ivi sioveeye nikivuni kigira utie inzi mba. Inzi si ndakoyembelera mba.

⁸ “Ligali ivi umali komoloma, na inzi mbuliyi, inzi mali kuhulira amakuva googo.

⁹ Ivi ovola, ‘Inzi mbeeye mulahi vugira uvwoni. Mbeeye musereeze kandi muvoholore kutura ku mahiolo.

¹⁰ Navuzwa Nyasaye yenya kivuni chukunzihambizira ku, kandi yambalizaa kuva kuli musigu weve.

¹¹ Avohaa virenge viange ni minyororo, kandi ahenzerizaa zinzira ziange ziosi.’ ”

¹² Navuzwa ngovolera Ayubu, ivi oveeye namashioro. Nyasaye aveeye munene kuvita mundu woosi.

¹³ Kigira ki uyalaa Nyasaye ku livula kutivulira mundu lielilira lilie?

¹⁴ Kali niiva Nyasaye amolomaa, niyiranira malala mere, siaveeye ho nu mundu uhuliriza vulahi ichavoolaa mba.

¹⁵ Lwa vandu vagona havudiku, Nyasaye amolomaa kuvo kuvitira mu maloto kandi mu malola.

¹⁶ Avakolaa vahulirize ku agaavoola, kandi vatihizangwa ni lieganihiza lilie.

¹⁷ Nyasaye amolomaa kuvakola valeke kokora uvwoni, kandi avahonyiaa kutura mu liegingira.

¹⁸ Sialavaleka vadivi mba; avahonyiaa kutura ku likuza.

¹⁹ Nyasaye ahezaa mundu amageri gu vusaliri vululu mu kidali chiche, uvuzunu vululu ligali vugumiraa vivero viu muviri gwigwe vugira kolekera.

²⁰ Mulwaye zana agotizaa uvuha vwu kulia chukulia, kali chukulia kilahi ligali, kelolekaa kuva chukuvihiririza.

²¹ Muviri gwigwe gumali kugwa hazwa kali sianyala kololeka mba, kandi vigumba vivie iviavulaa kololeka vihinduki.

²² Aveeye ahimbi ligali kwingira mu kilindwa, ni livamwoyo lilie liveeye ahimbi ku yavo avaleetaa likuza.

²³ Hawundi engelosi anyala kuuza kokonya mulala ku zingelosi va Nyasaye zielefu, avukwizuliza vandu amakuva gi miyinzi jaavo.

²⁴ Mu livererera, engelosi zana alavoora, “Muvoholore! Sialazia musi mu kivala cha vakuzu mba. Ngugu hano mutungu gwu kumuvoholora.”

²⁵ Hene yaho muviri gwigwe gunyala kuva kuli gwu mwana mudoto, leka yirani kuva kandi ni zinguru zizie ziovosoleri.

²⁶ Lwu mundu asaalaa, Nyasaye amutuliraa; alasigamira Nyasaye nuvusangali. Nyasaye alakola vindu viosi kuva vilungi kuye kandi.

²⁷ Alavoora imbiri wa vandu vosi, “Ndamala kwona, na sindakola malungi mba, navuzwa Nyasaye siyamba amageri mba.

²⁸ Nyasaye umali kombonyia mburi kudivila mu kilindwa, kandi ndamenya kolola uvulavu.”

²⁹ Henza! Nyasaye akoleraa mundu makuva yaga goosi, haali kaviri, kali haali kavaga.

³⁰ Nyasaye ahonyia livamwoyo liu mundu kutura mu vogo, kandi aduuki kolola uvulavu vwi livamwoyo.

³¹ Kalunu Ayubu, huliriza ku agambooraa; ukiring'ane ligali, na oleke molome.

³² Navuzwa niiva oveeye nikindu chokovoora, ombolere; ndakavugiliyi nuvusangali ndi, ivi oveeye mu vulungi.

³³ Navuzwa nigataveeye ndio, ukiring'ane ligali na umbulirizi, na inzi ndakwigiza kuli unyala kuva mugeri.