Ayubu 32 - KITABU KITAKATIFU

Limoloma lia Elihu 32:1—37:24

¹ Kunangwa avandu vavaga yavo: Elifazi, Bilidadi na Sofari valekera litivulira Ayubu, kigira Ayubu yalora ndi yaali mulungi.

² Navuzwa Elihu, muyaayi wa Barakeli kisukururwi cha Buzi, uwinyumba ya Ramu, yaali nu vutima na Ayubu ligali kigira Ayubu yekola kuva mulungi, nukudura Nyasaye.

³ Kandi yaali nu vutima na valina vavaga va Ayubu kigira sivahaana mativuli ku Ayubu mba, kali vaali nivamukalagiyi kuva mudamanu.

⁴ Kunangwa Elihu yalindagilira komoloma ku Ayubu kigira vaali avahindira kuye.

⁵ Navuzwa lwa Elihu yalora ndi sihaveeyeho ni litivuli kutura ku vasaza vavaga yavo, yaali nu vutima vonene ligali.

⁶ Maku Elihu, muyaayi wa Barakeli yativura, “Inzi mbeeye musoleri navuzwa munyi muveeye avasaakulu ligali; kunangwa inzi ndaali nuvuti kumuvolera zing'anagani ziange.

Elihu

⁷ Ndavoora mu mwoyo gwange, ‘Leka ava madiku manyingi vamolome, kandi avimihiga minyingi vigizi ovogeri.’

⁸ Navuzwa ni roho ogoveeye mu mundu, umwika gwa Nyasaye Uwanyala Viosi gohezaa avandu vogeri.

⁹ Sivaveeye avasaakulu veng'ine vuzwa avaveeye avageri, kandi sivaveeye avasaakulu veng'ine avamanyirizaa agaveeye malungi mba.

¹⁰ Kunangwa kalunu, nyenya mumbulirizi; leki na inzi muvoolere aga ng'anagana.

¹¹ “Inzi mbulirizi nuvwikuziri lwa mumolomangi, kandi ninindilira lwa mwenyererizangi livoora lienyu liovogeri.

¹² Ndakumuhuliriza nu mwoyo gwosi, navuzwa si haali ho numulala ku munyi uhangalizi Ayubu; anoho utivuuyi kindu ku makuva geege mba.

¹³ Mwilindi, gase mulavoola, ‘Kalunu kumali konyoora ovogeri.’ Nyasaye niyie unyala kutivulira Ayubu, siaveeye mundu mba.

¹⁴ Ayubu amolomangi ku munyi, siaveeye inzi mba, kulwayago, sindamutivulira kuli munyi mumutivuliiyi mba.

¹⁵ “Munyi mugenyi, simuveeye ni chukutivura mba; munyi simuveeye ni likuva lia muvooraa mba.

¹⁶ Gandukira nzizagiliri kulindilira lwa mukiling'ani machiriri? Kigira musingiyi vuzwa vugira kutivula kindu.

¹⁷ Awa, inzi ndahaana litivuli liange kalunu; kandi ndamuvolera ichang'anaganaa.

¹⁸ Mbeeye namakuva manyingi ligali kovora, mwoyo gwange gunzuvaa mbore.

¹⁹ Niiva sindanyoola uvwiyangu okomoloma, ndatanduka kuli imuuya ye kesero iyizuuyi iwaini imbia.

²⁰ Kuduuka molome kunangwa nduuki konyoora vosoosi; kuduuka ngunuli munwa gwange nukutivula.

²¹ Sindayanzilira mundu kuvita wundi mba, anoho kutumikira amakuva gukwizominya mundu vuzwa muvugaadi mba.

²² Inzi simanyi kugaada namakuva gilizominya vuzwa, na niiva ndakakoli ndio, ngano Nyasaye yakambeeye amageri.”