Ayubu 31 - KITABU KITAKATIFU

¹ Inzi mali kolomba lilagana ndi, sindaheenza mukaana nu kumwegomba mba.

² Amadanyi gange kutura ku Nyasaye oveeye igulu ligali gaveeye ki? Mitungu jange kutura ku Wuvunyali wu mwigulu giveeye ki?

³ Nyasaye atumaa kivi ku yavo avatali avalungi? Kandi atumana lidiviza ku yavo avakolaa uvudamanu?

⁴ Nyasaye amanya vindu viosi viangolaa, nukuvaliza zinduvatiru ziange ziosi zia inzi senaa.

⁵ “Niiva menyaa ku lilonda ovovehi kandi niiva nyagura zimbiru ku livoolera avandu uvugadi,

⁶ vwakaveeye vulahi Nyasaye yangere ku ziratiri zinndahi, na alanyoola ndi inzi simbeeye niimbala mba.

⁷ Niiva ndagirung'ana kutura kunzira inungi, na umwoyo gwange niguva nigolonda liegomba lie zimoni ziange, kandi niiva ngoleywi mumwamu ku likora uvwoni,

⁸ hene yaho Nyasaye aleke avandu vandi valie viukulia viandataga, kandi vitagwa viu mu mulimi gwa viononywi ligali.

⁹ “Niiva ndamala kukayirwa kuva nu mukali wu mutende wange, kandi niiva ndivisa nukulindilira ichova wi kiliango chiche,

¹⁰ hene yaho Nyasaye aleke mukali wange ave mutumikiri wu musaza wundi. Kandi leka vasaza vandi vave harara naye.

¹¹ Kigira yaga gaveeye uvwoni vonene ligali, gadukanaa mukalagi ahaane mageri malulu ligali.

¹² Yaga galava kuli muliru gusambaa kuduuka ku lidiviza gulasamba viosi viambeeye navio.

¹³ “Lwa mulala ku vatumikiri vange yava yilirira ku inzi, ndahulirizi makuva geege nu kumukolera vulahi ligali.

¹⁴ Niiva si mbulirizi ku makuva geege, ndakasingiiyi ndi imbiri wa Nyasaye? Ndativula kindiki imbiri wa Nyasaye lwa yaza kungaragira?

¹⁵ Nyasaye mulala mwere wanomba munda mwa mama wange, kandi uwalomba mutumikiri wange. Oyo niyie walomba kunyi kwosi.

¹⁶ “Sindasula kokonya avadaka mba; sindakola ku avakunzakali kukuza mioyo mba,

¹⁷ anoho si ndaleka avavisandu kuva ni inzara, lwa inzi ndiza chukulia mba.

¹⁸ Inzi ndaavalinda vosi kuli baba wavo kutura vosooleri vwavo kandi ndaavimilira kutura mu vosooleri vwavo.

¹⁹ “Niiva ndola mundu nadivaa kigira livula kuva nizinguvu, anoho mundu mudaka nataveeye nizinguvu ziukwivika,

²⁰ ndamuheeza zinguvu zialombwa kutura ku vwoya, vwi chayo cha magondi gange. Hene yaho yahaana lisandiza ku inzi nu mwoyo gwigwe gwosi.

²¹ “Niiva ndagaada umuvisandu, ninganagana ndi nyara kuguuta mu kiyaalo,

²² hene yaho, vwakaveeye vulahi mavega gange gavunanywe, kandi makono gange gatandulwi kutura ku mavega gange.

²³ Kigira ndatia konyoora mageri kutura ku Nyasaye, sindaali nyara kokora vindu kuli yivi mba.

²⁴ “Inzi si ndavika lisuuviriza liange mu vutugi kali hakuzu mba, anoho kulanga izahabu indahi kuva lisuuvira liange mba.

²⁵ Si ndasangara ku kigira miandu jange jiali minyingi mba, anoho sindaasangara ku kigira makono kange gaali ni ingavi mba.

²⁶ Inzi si ndaasigamira ku iliuva kigira vwaku vwalio mba, anoho umweli mu vulahi vwagwo mba.

²⁷ Inzi sindagirung'ana ku nu kuvisigamira mba, anaho mu livisa mukono gwange mu lihaana luyali kuvo mba.

²⁸ Uvwoni vudamanu kuli yivu, vuduukana vukalagirwi mageri gi likuza. Kigira vwambakanaa Nyasaye Wuvunyali.

²⁹ “Inzi sindaali ku nu vusangali lwa avasigu vange vaali mu lisalirizwa mba, anoho sindasangala ku lwa vaali mu kivi mba;

³⁰ inzi si ndaakola ku uvwoni kuvalaama vakuzi mba.

³¹ Avatumikiri vange vosi vamanya vulahi ndi ndingiriza no kogenihiza avageni kazozo.

³² Ndaagenihiza avandu vokologendo munyumba yange, na sindavaleka vagone kuzinzira mba.

³³ “Avandu vandi vageriza kuvisa uvwoni vwavo, navuzwa inzi ngikiri kuvisa uvwoni vwange kali hakuzu mba.

³⁴ Ngikiri kukutia kusingira imbiri wi kiduma kenene cha vandu, anoho kukiring'ana makiriri, nu kwihanira munyumba, kigira mali kutia litihizwa liavo, anoho lilegerizwa liavo mba.

³⁵ O, vwakaveeye vulahi alavaho nu mundu mulala wu kumbuliriza! Nguyu mbikaa muhuri gwange ku livoora liange! Leka Nyasaye Wuvunyali andivuliri! O, vwakaveeye vulahi umusigu wange alang'oda mayaalo gege ku inzi.

³⁶ Ngano ndakagiviiki ku mavega gange ni liegingira, kandi ngano ndakagevohi ku mutwi kuli itaji.

³⁷ Ngano ndakavoleeye Nyasaye kindu choosi cha mali kokora, nu kuzia imbiri kuli mwami.

³⁸ “Niiva ndiiva mulimi gwa nimaa mu, nu kuguvugula kutura ku mundu mwene gwo

³⁹ niiva mali kulia viukulia viatagwa mu, vugira kutunga mitungu javio nokokola avalimi vene milimi yijo vakuzi ni inzara,

⁴⁰ hene yaho, leka amafwa gaviruki mu muvogono vwi ingano, na indiva emeraa mu mulimi yigu mu vogono vwi ishairi.” Makuva ga Ayubu gaheri hano.