Ayubu 30 - KITABU KITAKATIFU

¹ “Navuzwa kalunu avandu vaveeye avana ku inzi, ava ndaali nyara kuchaaya ava baba vaavo vaangolera kehenyahenye; kandi avandaali nyara kuvula kuvugilira vakonye zimbwa ziange kulinda chayo cha amagondi.

² Ndaali nyara konyoora ki kutura kuzinguru zia amakono gaavo; avandu vaveeye vadedekere ligali?

³ Avandu yava vaali avadaka ligali kandi vaali ni inzara inyingi ligali mwigendanyama ing'inga yu vudiku, kali vaguguna ku miri miumu ligalimu marova amuumu.

⁴ Ing'inga yeyo viha vitagwa mu changalangwe na amatu mu militu nivalia kuli chukulia, kali vavugura imiri ji misaala ja meyo nivalia.

⁵ Vakungwa kutura hagati ha vandu vandi, vavakubira liyoga kuli avakungaa aviivi.

⁶ Avandu yava vanigwa komenya mu zimbangaywa, mu malina gayavwa mu magina nu mu marova.

⁷ Vakuba lwanga kuli zinyama ziu mbulimu, vivungizaa harara isi wi visaka mbula vave nu luya.

⁸ Kiduma cha vandu vaveeye vuzwa kandi avatamanyikani vaakungwa kutura mu kivala.

⁹ “Kalunu vazaa ni vasekeriza mu zinyimbu, simbeeye kindu kuvo navuzwa kehenyahenye.

¹⁰ Avandu vandunyiraa ligali nu kwiyahula ku inzi. Sivalindagiliraa ukunduzira amate mu moni mwange mba.

¹¹ Kigira Nyasaye umali kongola mudedekere kandi utiinyaliza, vangirung'ana nu kunzingilira nu vutima vonene ligali.

¹² Kiduma kenene chanzingilira kutura imbiri, vangunga zimbiru ligali vetegeka kundulira lwu kumaliriza.

¹³ Vononya inzira yange yokohona kandi vameda ikivi ku kivi change, sihaliho nu mundu kali mulala wu kuvagaya mba.

¹⁴ Avandu yava vanzingilira kuli avasikari vingilira mu lidigi likingaa inzi, vanzingila nu kunduvuranya ligali.

¹⁵ Inzi mali kuguutwa ni litihizwa linene, umali kutulizwa ho luyali lwange kuli imbuza; kandi ligasizwa liange limali kutulizwa ho kuli ililesi.

¹⁶ “Kalunu mbeeye ahimbi kukuza, sihaveeyeho novosoosi kuturana nuvusaliri vwange mba.

¹⁷ Ing'inga yu vudiku, vigumba viange vizunaa vululu; kandi vuzunu vungugunaa sivoveeye ni lisosa kali hakuzu mba.

¹⁸ Nyasaye angumiraa ku ligoti lie iganza yange nu vutima, nukusiita zinguvu ziange kutura mu vogono vwazio.

¹⁹ Nyasaye usiuvi hasi mu vodohi, kandi mali kugwa kuli luguchi ni ligoke.”

²⁰ O, Nyasaye, “Nzanira ku ivi, navuzwa ivi siundivuliraa mba; kandi lwa sala ku ivi kazozo si umbuliriza mba.

²¹ Ivi umali kugirung'ana nukuva mululu ku inzi, mu zinguru zizio zinene, udambizi ligali.

²² Ivi oletaa imbuza kumbunzulanyia yiyi ni yiyi. Ivi umbunzulanyia yiyi ni yiyi mu imbuza yi kiihi,

²³ inzi manya ndi ivi umbilaa kuduuka ku likuza, kandi nu kumbika havundu halomberwa avaveeye mwoyo vosi valizia.

²⁴ Kigira ki wingiliraa mundu umali kudiva, oyo utanyala kokora kindi, navuzwa yaniraa anyoore vokonyi?

²⁵ Inzi si ndaalira harara na yavo avaari mu vudinyu? Kandi si ndaavelerera yavo avaari avadaka?

²⁶ Navuzwa lwa ndahenzelera uvulahi, uvudamanu vwaduuka. Kandi lwa ndalindilira nyoore uvulavu, kisundi chaduuka.

²⁷ Mwoyo gwange gukubaganaa mu linyang'ana, na sigwituliraa mba; amadiku gi kivi gaduuki ku inzi.

²⁸ Ng'endagenda mu kisundi vugira kolola iliuva; singira mu livugana ninzanira mbula nyoore vokonyi.

²⁹ Lilira liange liveeye liokoveleriza kuli lie kivwi anoho indizu, kandi mbeeye mulina wi livuudu mwigendanyama.

³⁰ Ligodo liu muviri gwange ligwiyi limwamu, kandi limali kulanduluka; muviri gwange gusambiywi nuluya.

³¹ Lwimbu lwu vukana vwange ni lugilung'anyiywi kugwa lwi lisioma, Lwimbu lwi lilele liange lugirung'anyiywi kugwa lwa yavo avalira.”