Ayubu 3 - KITABU KITAKATIFU

Lielilira lia Ayubu ku Nyasaye

¹ Inyima wayaga, Ayubu yaatanga limoloma nalaama lidiku lilie lia yiivulwa.

² Yativura navolera Nyasaye,

³ Leka lidiku lia ndivulwa; kandi uvudiku vwa mama wange yambereka vulaamwe!

⁴ O, Nyasaye, ugirung'anyie lidiku yilio live kisundi. Utizuliza lidiku yilio kandi mba; kandi utaleka uvulavu vong'ereng'ane kulio mba.

⁵ Ulikole live lidiku lie kisundi, kandi liokovereriza, chiriri kimwamu kikunikwi na malesi ligali; kandi uvumwamu vwi kisundi vulitiihizi.

⁶ Leka kisundi kenene kikuniki uvudiku yivwo! Leka vuvuli kusangara hagati ha madiku gu muhiga. Leka vuvuli kuvalizwa harara na madiku gi mieli.

⁷ Leka vudiku yivwo vuve vugumba, kandi leka mioyo ju vusangali jivuli kuhulilika.

⁸ Volera avasigitiri valaame lidiku liene yilio, yavo avaveeye nilimanya liu kwamiiha Leviazani.

⁹ Leka zing'ereng'ani zia mugambazuri zialio zigwi kisundi; kandi avuli kolola vwaku vwi liuva lia mugambazuri,

¹⁰ uvudiku yivwo vulaamwe kigira vwahaana vwiyangu inzi kwivulwa, nu kumbika mu kivala chizula maduywa nu vudamanu zing'ano ziosi.

¹¹ Kigira ki inzi niimbura kukuza ningikiri munda mwa mama wange? Anoho niimbura kukuza ing'inga ndivulwa?

¹² Kigira ki mama wange yambika ku magulu geege? Kigira ki yambugilira kunuuna maveere geege?

¹³ Ndava nindakuza, ngano mbeeye mu lisosa kalunu.

¹⁴ Ngano ng'onaa zindolo kuli avami na vamiihi vandi vilirova, avumbaka zinyumba ziu vwami zia kale.

¹⁵ Ngano ng'onaa kuli avanene vimiliri avizulizaa ifeza ni zahabu mu zinyumba ziavo.

¹⁶ Vwali vove vulahi ndivulwa ninguzi, kandi ndateevwa, ndaavura kolola uvulavu vwi lidiku kali hakuzu.

¹⁷ Vandu vadamanu valeka likora vudamanu vwu kudambiza mu kilindwa, na vayinziri vamali kuluha, vanyoola lisosa.

¹⁸ Mwene yimwo, avahambe vanyoola lielemeriza mu mirembe, kandi sivahulira mwoyo mululu gwi lidambiza lia avanene vaavo mba.

¹⁹ Mwene yimwo, avandu vosi vaveeye ho, avanene na vakeekeke, na vatugwa vaveeye vavoholole kutura ku vanene vaavo.

²⁰ Kigira ki oleke avandu vazizagiliri komenya mu vuzunu? Kandi kigira ki uhaane livamwoyo ku vandu vaveeye mu vovereri?

²¹ Avandu yava vegomba likuza, navuzwa sivalinyoola mba. Vegomba kuzia mu kilindwa kuvita kwenya nokonyoora vutugi vwa vutswa.

²² Avandu yava vasangalira likuza ligali, kandi vayanza lwa vatevwa mu kilindwa.

²³ Kigira ki mundu wi zinzira zizie ziaviswa ahevwe livamwoyo, mundu wa Nyasaye yavikira lugaga kumwigalira?

²⁴ Kigira lizuunwa liu vusaliri liange nilio chukulia change, na lilira lie likenya lizukiywi kuli amazi.

²⁵ Yicho cha mbeeye nacho nuvuti kimali kungwira, na yicho kitihizaa inzi ligali nicho ichekolekaa ku inzi.

²⁶ Inzi si mbeeye ni mirembe, anoho uvwelemelizi, kinga vosoosi mba, navuzwa uvudinyu vwange sivoheraa mba.