Ayubu 29 - KITABU KITAKATIFU

Limoloma lia Ayubu liukumaliriza: 29:1—31:40

¹ Ayubu yaatanga limoloma kandi, navoora,

² O, niiva ndakaveeye kuli mu mieli ja kale. Kandi kuli mu madiku lwa Nyasaye yaanindaa;

³ Ing'inga yeyo ya Nyasaye yang'ereng'ana ku inzi, kandi ndaagenda mu vulavu vwivwe kuvitira mu kisundi.

⁴ Ing'inga yene yeyo, ndaali mu ligasizwa, kandi Nyasaye yakinga inzi harara ni inyumba yange.

⁵ Nyasaye Wuvunyali yaali ni inzi lwene yilwo, kandi avana vange vaali ahimbi ni inzi;

⁶ zing'ombe ziange kandi zimburi ziange ziahaana ku inzi maveere manyingi, kandi misaala ji mizabibu jahaana amaguta amanyingi.

⁷ Lwa ndaaziza havundu hukuvuganira mu lidaala linene, ndavugura vwiyangu vwange havundu hu luyali hagati ha vakulundu.

⁸ Nonoho lwa ndaduuka avasoleri vandekera vwiyangu, navakulundu vasingira kuhaana luyali ku inzi.

⁹ Aviimiliri va avandu vosi valekera limoloma, kandi vaakunika minwa jaavo na amakono gaavo.

¹⁰ Mioyo ja avakulundu vu luyali jachiring'anywa, kandi zinimi ziavo ziahanda mu vikalakula viavo.

¹¹ “Vuli mundu woosi wandola, anoho uwahulira amakuva kigira inzi, yaali ni vindu vilahi kovora kigira agandaali ningoli.

¹² Yaga gaali ndio kigira ndakonya avadaka avaaniraa ku inzi, kandi ndakonya avavisandu avataali nu mundu uvakonyaa.

¹³ Mundu uwaali ahimbi kudiva yangasiza, kandi ndaakola avakunzakali kwimba nu uvusangari.

¹⁴ Vutakatifu vwange vwangunika kuli inguvu, kandi uvulungi vwange vwali kuli iganza ni igudwa.

¹⁵ Ndaali zimoni ku avavoku, kandi ndaali baba ku avalema.

¹⁶ Ndaali baba ku avadaka, kandi ndenyeleriza amakuva ga uyu wa ndaavura kumanya.

¹⁷ Ndononyia zinguru zia avandu vadamanu, kandi ndaahonyia vilaanye viavo.

¹⁸ “Maku ndaaganagana ndi, ‘Inzi ndakuzira munyumba yange, kandi ndaameeda madiku gi limenya liange kuli muyeke,

¹⁹ ndaali kuli umusaala gwimiri jagwo gonyoora amazi kazozo, kandi gwi zisia ziagwo zisamwa ni lime.

²⁰ Vuli mundu yahaana lizominya ku inzi vuli kazozo, kandi ndanyoora zinguru vuli kazozo.’

²¹ Lwa ndahaana zing'anagani ziange, avandu vachiring'ana, kandi vahuliriza ligali amakuva ga ndavoora.

²² Lwa ndaali nimaliye limoloma, avandu si vavoola kindu ku makuva gange mba, kandi amakuva gange gaduukaa mu mioyo jaavo ligali kuli litonyatonya lie imbura.

²³ Avandu vanindilira kuli avalimi valindilira imbura. Kandi vakuunula minwa jaavo kuli imbura yu kutaga.

²⁴ Ndavamwenyera lwa vaali ni vagotizi lisuuvirizwa liavo, uvusangari vwu mumoni mwange vwadinyiriza.

²⁵ Ndaali kuli mwamihi wavo kandi ndavamanya zinzira ziavalondaku, ndamenya hagati haavo kuli mwami amenyaa hagati ha avasikari va amahi veve, ndavaleminya mioyo kuli mulala aleminyaa yavo avasioma.”