Ayubu 28 - KITABU KITAKATIFU

Lizominya kigira ovogeri

¹ Ligali haveeye ho na malina umwa izahabu iyavangwa. Haveeye ho havundu aha izahabu isiyilangwa.

² Avandu vayava kivia kutura mu marova. Kandi vasalulukiza mugasa kutura ku magina.

³ Avandu vazizaa mu kisundi, kandi venyeleriza ihale musi mwisi lirova kandi vayava magina guvuguli kutura mu kisundi kenene.

⁴ Avandu vayava malina ga magina guvuguli ihale kutura ha vandu vamenya ahe kerenge chu mundu kikiri kogenda. Umwene yimwo vayinzira mu kesoma niveleela ku migoye mu vogo.

⁵ Viukulia vinyolekaa kutura ku, navuzwa isi wi lirova lilala liere, viosi vitandulangwa nukuduvulanywa.

⁶ Amagina gu mulirova gaveeye mu ni rangi yabulu, na uluguchi lwago loveeye mu nizahabu.

⁷ Iliive liosi liliizaa inyama sililimanya, inzira yukwingira aha magina guvuguli gaveeye kinga emoni ye esooti ikiri kugelola ku mba.

⁸ Isimba kinga zinyama zinduru sizigenda kuzinzira ziekesoma yizio mba.

⁹ Avandu vatanyia zinyanda zindinyu ligali valima vigulu kuduuka ku vitinya viavo.

¹⁰ Vayavaa zinzira mu zinyanda vanyola amagina guvuguli vonene.

¹¹ Vayava kuduuka ku vutangiliru vwi migera ma valeta kuvulavu iviali niviaviswa.

¹² Navuzwa ovogeri vunyala konyoleka haliha? Ni haliha ahi limanyiriza linyoleka?

¹³ “Mundu siamanyi inzira yo vogeri mba; kandi ovogeri sivonyolekaa mu kivala cha avaveeye mwoyo mba.

¹⁴ Luliva lovoolaa, ‘Ovogeri sivoveeye mu inzi mba,’ Inyanza enene evooraa, ‘Sivoveeye mu inzi mba.’

¹⁵ Ovogeri sivunyala kugulwa ni izahabu mba, kandi ifeza sienyala kubimwa kuvuguli vwavwo mba.

¹⁶ Sivunyala kugulwa ni izahabu ya Ofura mba; anoho magina guvuguli vudinyu anoho izahabu mba.

¹⁷ Izahabu anoho magina gi chelolero sivinyala koleng'anywa navwo mba kandi sivunyala kukiranywa niviju viezahabu indahi mba.

¹⁸ Uvuguli vwo vogeri vuviti ligali uvuguli vwi ilulu anoho magina makanyu.

¹⁹ Etopazi ya Ezopia sinyala koleng'anywa kuvwo mba. Kandi uvuguli vwavwo sivunyala koleng'anywa ku vuguli vwi izahabu isiyiiywi mba.

²⁰ “Kunangwa, ovogeri vuturaa haliha? Limanyiriza limenya haliha?

²¹ Vwavisika kutura mu zimoni zia vosi avaveeye mwoyo, vwavisika kali ku manyonyi gumuvwerefu.

²² Vwoneku ni likuza vivoora, ‘Kwahulira vuzwa limonya liavwo.’

²³ “Nyasaye amanya inzira yukuduuka kuvwo kandi oyo yeng'ine amanya aha vomenyaa.

²⁴ Kigira oyo alolaa kali kuduuka ku keheri chi lirova, kandi alolaa vuli kindu isi wi ligulu.

²⁵ Lwa Nyasaye yaaha imbuza zinguru ziayo, nokogerera inyanza ovonene vwayo;

²⁶ lwa Nyasaye yalaga ahi imbura ikubaa, kandi inzira yo loheni ni inguba vivitira ku;

²⁷ yilwo nilwo lwa yalora ovogeri kandi nageriza vulahi vwavwo naavuha vunyali vwavwo.

²⁸ “Maku Nyasaye yavolera mundu, ‘Heenzi! Kutia Yahova nivwo vogeri; na ukweleha kuvudamanu nilio limanya.’ ”