Ayubu 27 - KITABU KITAKATIFU

Ayubu

¹ Ayubu yaazizagilira komoloma, navoora,

² Nzisuha ku Nyasaye Wuvunyali oveeye mwoyo, usulaa inzi mburi konyoora likalagirwa liange lirungi, kandi alombaa livamwoyo liange lilulu!

³ Lwa Nyasaye akembeeye livamwoyo,

⁴ munwa gwange sigulamoloma uvudamanu mba, kandi lulimi lwange silulavoola uvugadi mba.

⁵ Sinyala kovora ligali ndi avasaza munyi muvooraa agiligali; Ndinyirizaa kovora ndi inzi simbeeye niimbala mba kuduuka likuza liange.

⁶ Ndazizagilira kovora ndi mbeeye mulungi! Mwoyo gwange sigulang'ondokera lwa inzi mbeeye mwoyo.

⁷ Avasigu vange vosi avahing'anaa ninze kandi avanwaana, vahevwe amageri kuli avachamu na avataveeye avalungi.

⁸ Ni lisuuvirizwa ki liveeye ho ku yavo avatatiizaa Nyasaye, ing'inga ya Nyasaye atulizaa ho livamwoyo liavo?

⁹ Lwa kivi kiduukaa, Nyasaye alahulira lilira liavo?

¹⁰ Avadamanu vanyara kusangara imbiri wa Nyasaye Wanyala Viosi? Vanyara kwanira Nyasaye zing'inga ziosi?

¹¹ Leki inzi mwigize kuli ovonene vwi zinguru zia Nyasaye voveeye; ma kandi mwivaliri cha Nyasaye Wanyala Viosi amali kolohiza.

¹² Navuzwa, awa, kali ndio, munyi mwosi mumali kwelolera aveene. Kunangwa, kigira ki mumolomaa uvusiru kuli yivu?

Zofari

¹³ Nindio Nyasaye ahaanaa amageri ku avandu vachamu. Kandi avadambizi.

¹⁴ Niiva avana valamedeka kuvo, valitirwa mu vulwani, kandi visukululwi viavo si valava ni chukulia kivaduuka mba.

¹⁵ Yavo avalihona, valakakuzi kigira uvulwaye vudamanu, kandi kali vakunzakali vaavo si valakavasiomele mba.

¹⁶ Kali niiva valavungiza izahabu kuli luguchi, kandi niiva valavungiza zinguvu kuli marova,

¹⁷ hawundi vavungiza, navuzwa avalungi valazivugula, kandi avandu vatali nimbala valavugula izahabu nu kugavulana.

¹⁸ Umundu muchamu yumbaka inyumba yeeye kuli inyumba yu luvuvi, anaho kuli lidiri liu mulindi alombaa mu mulimi.

¹⁹ Umundu uyu azizaa kogona naveeye mutugi, navuzwa lwa avukaa, anyoora vutugi vwivwe nivutaveeye ho.

²⁰ Vindu viukutihiza vilamulondelera nukumugumira kuli amazi manene gizuyi. Mu vudiku hagati, kihuzuzi kenene kilamuhila ihale.

²¹ Imbuza enene yi kivi kutura ivugwi iramuhila ihale nukumutuliza ho. Iranweya kutura hango hehe.

²² Imbuza ilamuhunguza vugira kumuvererera, valageliza kuhandalara vaduuki kohona kutura mu vu vudinyu yivu.

²³ Imbuza imukubiraa liyoga lwa anyaguraa. Kandi imutihiza ni zinguru ziu kwononyia.