Ayubu 26 - KITABU KITAKATIFU

Ayubu

¹ Maku Ayubu yativura,

² “O, ongoonyi ligali, inzi mundu mudaka kandi mudedekere!

³ Uhaani zing'anagani zindahi ku oyo utali novogeri! Nu kusanga limanya liilio nu mundu musiru kuli inzi.

⁴ Nivwaha okokonyi komoloma makuva yaga? Kandi ni roho ki okokora komoloma makuva yaga?”

Bilidadi

⁵ Mioyo javakuzu, jidegera; mu mazi amanene isi wi lirova.

⁶ Kivala cha vakuzu keveeye ku vulavu imbiri wa Nyasaye, sihaveeye ho ni kindu kinyala kukikinga mu zimoni zizie mba.

⁷ Nyasaye yavaambuula uvwerefu ku lovega lwa ivaale, kandi niyeleriza lirova havundu hatali ni kindu chu ku ligumira.

⁸ Nyasaye niyie okola malesi, ukwizula amazi, na malesi zana sigatanduka kigira uvulitu vwa mazi mba.

⁹ Nyasaye avisaa umweli, mu malesi.

¹⁰ Nyasaye yavika ulwako imbiri wa amazi amanene, ni yavukanyia uvulavu kutura ku kisundi.

¹¹ Lwa Nyasaye atihizaa zitiru zigumira ligulu, zisungusika nokodegera nuvuti.

¹² Nyasaye nizinguru zizie yakiring'anyia inyanza; kandi yadiviza Rahabu mu ovogeri vwivwe.

¹³ Ku mwika gwigwe Nyasaye yahuuza no kolomba ligulu kolengera, kandi numukono gwigwe yita goyoka gwu munyanza ugwali ni gwirukaa.

¹⁴ Navuzwa, yaga gaveeye litanga vuzwa lie vikolwa vivie vie zinguru, yili ni limonya likekeeke vuzwa lia kuhulira mu makuva geege. Navuzwa, nivwaha unyala kumanya ligali ovonene vwi zinguru zia Nyasaye?