Ayubu 24 - KITABU KITAKATIFU

¹ Kigira ki Nyasaye siavikaaho ing'inga yi likalagirwa, lidiku lie likalaga lirungi ku yavo avamutumikiraa?

² Avandu vasuunda vigingi ku zinzako vanyoore mulimi munene. Viva amagondi nu kugavika harara ni viayo viavo.

³ Vavugura zisukiri zia avavisandu, kandi vavugura igiriki yu mukunzakali kuduuka lwa atungaa amagovi geege.

⁴ Vigalira avadaka vavuli konyoora uvulungi vwavo, kandi vaniga avadambi kunyagula nu kuzia kwivisa.

⁵ Kunangwa, avadaka venyeleriza viukulia mwigendanyama umwumu kuli zisukiri ziumuvulimu, navuzwa sihaveeye ho na havundu handi hoosi havanyala konyoora viukulia via avana vaavo mba.

⁶ Avandu yava kuduuka vagese vuswage mu milimi jitaveeye jaavo mba, kandi vaagura mazabibu mu milimi ja avandu vadamanu.

⁷ Vagona vugira inguvu vudiku vwosi, sivaveeye nikindu cha vanyara kwifuma vukindu mba.

⁸ Kigira imbura enene ikubaa mu vigulu, vaziliyi vikinga ku zinduru zie zinyanda mbula vavuli kuzilira.

⁹ Avandu vadamanu vavugura avana vavisandu nu kuvakola avatugwa, kandi vavugura avana va vadaka nu kuvakola kuva mitungu kigira magovi.

¹⁰ Navuzwa avadaka kuduuka vagendagende vugira zinguvu kandi kuduuka vagese vuswage kali nivaveeye ni inzara.

¹¹ Valomba amaguta kutura ku mizeituni, na iwaini kutura ku mizabibu, navuzwa yavo aveene vaveeye nu vuluhu.

¹² Likenya lia avandu vakuza lihulirika kutura mu lidaala linene, linene, kandi avatumitiywi vanira vokonyi navuzwa Nyasaye siahulirizaa lisaala liavo mba.

¹³ Vaveeye ho avandu avasuuraa uvulavu, si vamanyiriza zinzira ziu vulavu mba, kandi si vamenya muzinzira ziavwo.

¹⁴ Mulumindi avukaa mu mavwevwe aduuki kwiita avadaka na avadambi; kandi yivaa vudiku.

¹⁵ Umuheyi alindiliraa uvudiku vuduuki, avisaa mumoni mwimwe kunangwa mundu avuli kumulora.

¹⁶ Ing'inga yu vudiku, aviivi vafudura zinyumba, navuzwa ing'inga yu mbasu vivisaa vaduuki kwereha ku vulavu.

¹⁷ Kigira kisundi kenene ligali keveeye kuli uvulavu vwumugamba kuvo vosi, vaveeye avalina na vandu vatihiza mu kisundi kenene.

Zofari

¹⁸ Avachamu, vavugulwaa vwangu ni migelera ja mazi gizuyi, Nyasaye yalaama milimi jaavo, sivalazia kandi kuyinzira mu vizabibu viavo mba.

¹⁹ Kuli likonza likamaa mu muvasu, nindio avoni vakamaa vuzwa mu vilindwa via vakuzu.

²⁰ Kali avamama vaavo sivalamwizuliza kalunu mba. Valaliivwa ni zing'ende, kandi valononywa kuli misaala jimali kugwa hasi.

²¹ Yaga gekolekaa kigira vadambiza vakunzakali, kandi sivakolera avakali vagumba vulahi mba.

²² Nyasaye, mu zinguru zizie, adivizaa avizingulu; muvikolwa via Nyasaye avachamu vakuza.

²³ Nyasaye anyala kuvaleka vamenye mu mirembe, navuzwaa vahenzeriza ligali kazozo.

²⁴ Ku ing'inga engekeeke vachamu vagasizwa mu linyola, navuzwa vaniala kuli indiva, kandi kuli mitwi ju vuswage vogeseywi.

²⁵ Nigataveeye ndio, nivwaha unyala kukalagira inzi kuva muvehi, kandi kumanyia ndi makuva gange si gaveeye agiligali?