Ayubu 23 - KITABU KITAKATIFU

Ayubu

¹ Maku Ayubu yativura navoora,

² Kalunu, lielilira liange ku Nyasaye liveeye lilulu ligali, kigira azizagiliraa kuhaana amageri ku inzi mu likenya liange.

³ Si ndakamanyi ahanyala kumunyoola, kandi nduuki kuzia ahaaveeye!

⁴ Ngano ndakavooye makuva gange imbiri weve, kandi kumumanyia lienya liange.

⁵ Ndakayanzi kumanya aganyala kutivula ku inzi, kandi kuli anyala kundivulira.

⁶ Nyasaye yakahingani niinzi ni zinguru zizie ziosi? Awa, yakahulirizi makuva gange.

⁷ Inzi mbeeye musuuvirifu; na ndamoloma na Nyasaye wange, naye alambaliza kuva vugira imbara mihiga ni mihiga.

⁸ Inzi mali kwenyeleriza Ivugwi, navuzwa Nyasaye si aveeye yo mba. Si ndaamunyoora lwa ndaamwenyeleriza Imadioli mba.

⁹ Inzi mwenyelerizi Ivaale navuzwa simunyoye yo mba. Kali simunyoye isavaalu mba.

¹⁰ Nyasaye amanyirizaa zinzira ziange, niiva alangeliza, alanyoola inzi kuva mulahi.

¹¹ Virenge viange vigenda mu zinduvatiru zizie, mali kugumira ligali inzira yeeye, kandi si nyara kuzia halovega mba.

¹² Vuli kazozo inzi ngolaa aga Nyasaye yandaga, nondaa vulaliri vwivwe, navuzwa si nondaa lienya liomwoyo gwange mwene mba.

¹³ Nyasaye sianyala kugirung'ana mba, kandi siaveeye ho nu mundu unyala kuhing'ana naye mba, anoho siaveeye ho mundu unyala kumugaya kokora agalaliraa kokora mba.

¹⁴ Nyasaye alatwekiza agaamali kondovolera; kandi lilohiza yili liveeye lilala ku manyingi aga aveeye nago.

¹⁵ Kunangwa, inzi ndegeraa nuvuti ligali imbiri weve, lwa ng'anagana kuvindu yivi viosi.

¹⁶ Nyasaye umali kokora mwoyo gwange kuvunika, Wuvunyali utihiizi inzi.

¹⁷ Mali kukumbirizwa ni kisundi kenene, kandi kisundi kenene kikuniki mumoni mwange.