Ayubu 22 - KITABU KITAKATIFU

Livoolerana lia Kavaga 22:1—27:23 Elifazi

¹ Maku Elifazi kutura mu kivala cha Tema, yativura;

² “Umundu anyala kuva wovokonyi ku Nyasaye? Ligali uyu oveeye mugeri aveeye wovokonyi kuye mwene.

³ Uganaganaa uyanziza Wuvunyali niiva oveeye mulungi? Anoho gaveeye guvukala kuye niiva oveeye vugira imbara?

⁴ Uganaganaa akogondokeraa nakukalagira kigira ivi umutiizaa?

⁵ Uvudamanu vuvwo sivoveeye ovonene ligali? Sihaveeye nekeheri ku uvuchamu vuvwo mba.

⁶ Ivi wavugula zinguvu zia avadaka nukuvaleka chahonyo, kunangwa vaduuki kutunga magovi gaavo ku ivi.

⁷ Ivi wasuula kuhaana mazi ku yavo avaari nu uvuluhu, kandi wasuula kuhaana viukulia ku yavo avaari ni inzara.

⁸ Mundu wi zinguru yavugula kivala choosi cha avadedekere, nayaleka vandu vayaanzilirangwa komenya mucho.

⁹ Ivi wakunga vakunzakali vugira kindu choosi, kandi wavunaga makono ga avavisandu.

¹⁰ Na kigira yaga ivi ukumbiriziywi ni mitego, kandi nonoho, ivi wizuye uvuti vunyingi.

¹¹ Uvulavu vuvwo vokoleywi kisundi, kunangwa si ulalola kandi mba, kandi ukunikiywi na amazi amanyingi ligali.

¹² Nyasaye siamenyi igulu mwigulu ligali, na aheenzaa hasi ku zing'ereng'ani, kali niiva ziveeye igulu ligali?

¹³ Kunangwa ivi ovola, ‘Nyasaye amanyi kindu ki? Aveeye unyala kuhaana likalaga kuvitira mu kisundi kenene?

¹⁴ Amalesi maliduhu ga mukuniki, kunangwa sianyala kolola mba, kandi agendaa igulu mu vwerefu.’

¹⁵ “Ivi watovola kogenda mu zinzira zia vandu vadamanu vagenda mu kazozo?

¹⁶ Kali ing'inga yaavo nikikiri kuduuka, vahirwa ni migelera ja mazi.

¹⁷ Avandu yava vaavoolera Nyasaye, ‘Tula ku kunyi, kandi unyala kukokola kindiki?’

¹⁸ Navuzwa Nyasaye yayizuliza zinyumba ziavo ni vindu ivilahi, kunangwa zing'anagani zia avandu vadamanu ziveeye ihale kutura kuye.

¹⁹ Avandu valungi vasaangala kandi avandu vatali nimbara vaasekaa, lwa Nyasaye ahaanaa mageri ku avandu avachamu.

²⁰ “Viosi via avachamu vaveeye navio vimali kudivizwa kandi muliru gumali kusamba vindu viosi viatigala.

²¹ “Uvugiliri Nyasaye kalunu, na ulava mu mirembe naye; niiva ulakola ndio, alakugasiza.

²² Uvugiliri amigizu geege, kandi ugaviiki musi mwu mwoyo gugwo.

²³ Wirane ku Nyasaye Wuvunyali kandi wegehize kuye, kandi utulize uvudamanu vwosi munyumba yooyo.

²⁴ Usiuvi uvutugi vuvwo vwosi, na uvuguli izahabu ya Ofura ugisiuvi hagati ha magina gi migera ja mazi,

²⁵ Nyasaye Wuvunyali alava kuli izahabu yooyo; kandi alava kuli ifeza yooyo yu vuguli vonene,

²⁶ maku ulava ni liyaanzizwa mu Nyasaye Wuvunyali, kandi ulalola ndi aveeye litangilira liu vusangali vuvwo.

²⁷ Usaale kuye na alakuhulira; kandi uladukiza malagano googo naye.

²⁸ Ulagasizwa mu goosi ga okola, kandi uvulavu vulang'ereng'ana mu zinzira zizio ziosi.

²⁹ Nyasaye yikizaa hasi avigingiri, navuzwa alahonyia yavo avegehizaa.

³⁰ Nyasaye alasoola mundu utaveeye nimbara; alakohonya niiva agokolaa gaveeye malungi.”