Ayubu 21 - KITABU KITAKATIFU

Ayubu

¹ Maku Ayubu yativura:

² Muhulirize vulahi ligali ku makuva gange, muleke yili live lileminya mwoyo lienyu ku inzi.

³ Mwikuziri ku inzi na ndamoloma, na inyima wa mala komoloma, muzizagiliri kongolera kehenyahenye.

⁴ Kulwa inzi lielilira liange liveeye kigira mundu? Kigira ki mburi kuva niliekuzira?

⁵ Mumbenze na mugenye; mukuniki minwa jinyu.

⁶ Lwa nzizulizaa agekoleka ku inzi mbendaa mwoyo ligali, kandi mbeeye ni lidegera.

⁷ Kigira ki avandu vachamu vamenya, vaduuka kuva avasaakulu nokomedeka kuva nizinguru?

⁸ Valora avana vaavo nivagasizwa; kandi visukululwi viavo nivadinyirizwa imbiri wavo.

⁹ Nyasaye sialeta kivi ku zinyumba ziavo mba; sivamenyaa mu vutihizi kali hakuzu mba.

¹⁰ Zigiriki ziavo ziivulana vugira kogeeha zinguru. Kandi ziivulaa vulahi vugira kologosa.

¹¹ Vahiraa avana vaavo mukiguuti, na vasieva kuli vimeme via magondi.

¹² Vimba zinyimbu zie vikuli nuvukana vwi migoye, kandi vasangalira mwoyo gwi lilere.

¹³ Vamenya mu ligasizwa, vakuza mu mirembe ma vayavirwa.

¹⁴ Avachamu vaavoolera Nyasaye, “Tula ku kunyi.” Sikwenyaa kumanye zinzira zizio mba.

¹⁵ Wuvunyali nivwaha, kuduuki kumutumikira? Kulanyoola vukala ki ni kusaala kuye?

¹⁶ Vavoola ndi vanyoola miandu jaavo kutura kuzinguru ziavo aveene, navuzwa sinyala kuvugilira zing'anagani ziavo mba.

¹⁷ Ni haali kanga Itaya ya vachamu isiminyangwa? Ni haali kanga mulala kuvo yaanyoolaku kivi? Naho ni kanga Nyasaye yavaha mageri mu vutima vwivwe.

¹⁸ Navahuuza kuli mavululi gahuzwa ni imbuza mba, noho luguchi luhuuzwaa ni kihuzuzi?

¹⁹ “Munyi muvooraa, ‘Nyasaye ahaanaa mageri ku avana kigira uvwoni vwa avababa vaavo.’ Awa! Leki Nyasaye ahaane mageri ku avoni vene; leki amanyie ndi akolaa ndio kigira uvwoni vwavo.

²⁰ Leki avoni vanyoore amageri gaavo aveene. Leki vahevwe uvutima vonene vwa Nyasaye Wuvunyali.

²¹ Lwa livamwoyo liu mundu liheraa, ahenderaa avana veve vaalekaa inyima mwoyo?

²² Mundu anyala kwigiza Nyasaye ovogeri, ukalagiraa kali yavo avaveeye mwigulu?

²³ “Avandu valala vakuza nivaveeye mu ligasizwa liavo linene, nivaveeye mu lielemeriza ligali kandi mu mirembe.

²⁴ Miviri jaavo jizuuyi amaguta na ivigumba viavo vizuyi zinguru ziovosoleri.

²⁵ Avandi vakuzanga mu vuzunu vonene mu mioyo, nivakikiri kuzazama ku kindu kilahi mba.

²⁶ Navuzwa, vosi vakuza nokoteevwa mu vilindwa; vosi vakunikwa ni zing'ende.

²⁷ “Heenzi! Inzi manyi vulahi zing'anagani zienyu ziosi, kandi lilohiza lienyu liokongolera uvudamanu.

²⁸ Kigira muteeva, ‘Eveeye haliha inyumba yu mundu munene kalunu? Eveeye haliha inyumba yu mudamanu yamenya mu?’

²⁹ Mukikiri koteeva yavo avagendaa kuzinzira? Kandi mukikiri kuvugilira lilolekiza liavo?

³⁰ Ku lidiku lia Nyasaye aveeye nu vutima nukuhaana mageri, umundu mudamanu niyie ohonyiangwa kutura mu kivi.

³¹ Si haali nu mundu unyala kuyaala mundu mudamanu, anoho kumutunga ku goosi aga yakola mba.

³² Lwa agingwa kuhilwa mu kilindwa, kilindwa chiche kilindwa vudinyu ligali.

³³ Avandu vanyingi ligali vazizaa mu livugana lie likuza lilie, vagenda imbiri kandi inyima wi lisandugu; kali amalova gi kilindwa gaveeye amangu kuye.

³⁴ “Na munyi! Mugerizaa koneminya mwoyo na makuva gataali nikivuni. Vuli litivuli lia muhaanaa liveeye ovovehi vwere!”