Ayubu 20 - KITABU KITAKATIFU

Zofari

¹ Maku Zofari kutura Naama yativulira Ayubu:

² Kunangwa, zing'anagani ziange zingolaa kutivula, kigira mbeeye mulinyangizwa ligali.

³ Inzi mbulira ligondoka litambezaa uluyali, na limanyiriza liange linzuvaa kutivula.

⁴ Ligali ivi umanya kutura zing'inga zia kale, lwa Nyasaye yalomba mundu ku lirova,

⁵ uvusangari vwa avandu vachamu voveeye vwi ing'inga engekeeke.

⁶ Kali ovonene vwavwo nivoveeye vutambi kuduuka mwigulu na imitwi jaavo kudiira ku malesi,

⁷ navuzwa valahuuzwa ihale kuli luguchi. Yavo avavamanya valakavoole, valakagenye aveeye haliha.

⁸ Alatula ho kuli maloto, na sivalakaloleke kandi mba. Alakungwa kuli malola ga vudiku, na si alaloleka kandi mba.

⁹ Uyu uwamulola sialamulola kandi mba. Avandu vahango hehe sivalamulola kandi mba.

¹⁰ Avana veve valeenya zimbavasi kutura ku vadaka; naye mwene kuduuka yiranyie uvutugi vwivwe vwosi.

¹¹ Vigumba vivie vizuyi zinguru zio vosooleri, navuzwa viosi vilagona mu luguchi harara naye.

¹² Kali uvuchamu nivoveeye ovonolu kuli isukali mu munwa gwigwe, kali na vuvisaa isi wululimi lwilwe,

¹³ kali naava natavugilira kuvoleka vuzie, navuzwa ahaanda kuvwo mu munwa gwigwe;

¹⁴ Nitali viukulia vivie vigirung'anyiywi munda mwimwe, vigwiyi vilulu kuli uvusungu vwe zinzoka muye.

¹⁵ Mudamanu amiraa uvutugi vwa yiva ma avuluka kandi; Nyasaye avutulizaa, munda mwimwe.

¹⁶ Ichu mudamanu anuunaa keveeye kuli uvusungu vwe enzoka; na liluma lie kihiligoma lilamwiita.

¹⁷ Sialava mwoyo okolola migera ja maguta ga muzeituni. Kinga migera jiidolokanga maveere nuvwuki.

¹⁸ Aliranyia makuyu gologeli lwilwe goosi nigataliviywi; sialasangalira uvutugi vwivwe mba.

¹⁹ Kigira umali kudambiza avadaka nukuvaleka muvudaka ligali. Kandi umali kuvugura zinyumba zia yavula kwumbaka.

²⁰ Na kigira uvuviti vwivwe, sianyala kohonyia kindu ku viosi icha sangaliraa ku mba.

²¹ Lwa aliizaa, sikeveeye ho nikitigalaa; Kulwayago limedeka lie ligasizwa lilie si lilazizagilira mba.

²² Mu lizula liu vuduukiru vwivwe, ikivi kilamukunika, uvuliduhu vwosi vwo vovereri vulaza kuye.

²³ Lwa amala kulia viosi via yenya Nyasaye alatuma uvutima vwivwe vululu kuye. Alaviika uvutima vwivwe kuye kuli viukulia vivie.

²⁴ Lwa agerizaa kwiruka ku kivavi chikivia; uvuta vwu mugasa vulamulasa nu kumufuduranyia.

²⁵ Uvuta vufudulanyi mu muviri gwigwe, esonga yavwo eng'ereng'anaa yavitira mu ingudumani yeeye; na yaali nuvuti vonene ligali.

²⁶ Kisundi kenene ligali kivikiywi kigira mavikiru geege; umuliru gutaahambizwa nu mundu gulamusamba ligali. Viosi iviatigala munyumba yeeye vilahia.

²⁷ Ligulu lilavuula uvwoni vwu mundu uyu; kandi lirova lilamwingilira.

²⁸ Uvuhinda vwi inyumba yeeye vulatulizwa ho, mu lidiku liu vutima vwa Nyasaye.

²⁹ Yiki nicho kidieli cha Nyasaye aheezaa avachamu; Yiki nicho kidieli cha Nyasaye yavatovolera.