Ayubu 2 - KITABU KITAKATIFU

Ligerizwa lia Ayubu lia Kaviri

¹ Lwi lidiku liaduuka, zingelosi va Nyasaye vazia kwagana harara imbiri wa Yahova kandi, Setani yaliho hagati haavo.

² Yahova yateeva Setani, “Ivi utura haliha?” Setani yamutivulira, “Inzi nduraa kogendagenda yiyi ni yiyi nokovodong'ana mu kivala.”

³ Yahova yamuteeva, “Ololi ku mutumikiri wange Ayubu? Siaveeye ho numundu kali mulala ku kivala oveeye musuuvirifu kandi mulungi kuli Ayubu mba. Atizaa inzi, kandi yeleha kutura ku likora uvudamanu vwosi vwi lirova. Navuzwa akikiri vuzwa musuuvirifu kandi mulungi wange kali ivi nongoonyaa nguvugiliri umukuyi nukumudiviza ligali vugira kivuni choosi.”

⁴ Setani yativura, “Ligodo ku ligodo! Mundu alahaana viosi via aveeye navio kunangwa aduuki kohonyia livamwoyo lilie umwene.

⁵ Navuzwa kalunu nyira mukono gugwo na udiiri muviri gwigwe, naye alakonyega moni namoni!”

⁶ Maku Yahova yativulira Setani, “Goosi gaveeye amalahi, kalunu Ayubu aveeye hasi huvunyali vuvwo, navuzwa utamwiita mba, oleke livamwoyo lilie.”

⁷ Maku Setani yazia kutura imbiri wa Yahova Nyasaye, na yalomba Ayubu kuva na mavimba ku muviri gwigwe gwosi!

⁸ Ayubu yazia niyikara mu ligoke, navugura kijonjo natanga kwiyagira.

⁹ Hene yaho, mukali weve yamuvolera, “Ivi kuduuka lero ukikiri musuuvirifu ku Nyasaye kuli kazozo? Umunyege ligali, ma ukuzi.”

¹⁰ Ayubu yativulira mukali weve ndi, “Ivi omoloma kuli mulala ku vakali avasiru. Lwa Nyasaye ahaanaa vugasu ku kunyi, kuhaana lisandiza ni lizominya kuye, na chakaveeye ki kutange kwililira lwa aleetaa vudinyu ku kunyi?” Mu vudinyu nu vusaliri vwosi vwa Ayubu, siyavoola kindu kidamanu imbiri wa Nyasaye mba.

Avalina vavaga va Ayubu

¹¹ Ayubu yaali na avalina vavaga: Elifazi kutura mu lidaala linene lia Temani, Bilidadi kutura mu kivala cha Shua, na Zafari kutura mu kivala cha Naama. Lwa vahulira inguuva yuvusaliri uvwagwira mulina wavo Ayubu, vosi vatura sa mulala mu madaala gaavo, ni vazia kumulora nu kumuleminya mwoyo.

¹² Lwa vaali nivaveeye ahimbi kuduuka, valora Ayubu, navuzwa sivamumanyiriza mba. Navuzwa lwa vamumanyiriza, vatanga kukuba zikwiri ni valira, kandi vataandula zinguvu ziavo muvovereri, ni vaduuminya luguchi igulu ku mitwi jaavo.

¹³ Hene yaho, viikara hasi harara na Ayubu ku madiku saba, umbasu nu vudiku, na sihali ho na mulala wavoola likuva kali lilala, kigira valora vusaliri vwivwe vwali vwokoveleriza ligali.