Ayubu 19 - KITABU KITAKATIFU

Ayubu

¹ Maku Ayubu yativura:

² Mulazizagilira kuundambiza kuduuka ng'inga ki? Kandi mulambunanyia mu vidonye na makuva ginyu kuduuka ng'ingaki?

³ Mumali konyega haali kanyingi. Simuveeye soni kongolera vudamanu?

⁴ Niiva gaveeye giligali ndi inzi mali kuhiola, lihiola liange liveeye ku inzi mwene.

⁵ Niiva ligali munyi mwiyizominyaa aveene kuva valahi kuvita inzi, nokokola kivi chi ligelihiza liange kuva lihing'ana ku inzi,

⁶ mumanye ndi Nyasaye ongoleeye vudamanu, kandi yaandegi nu mutego gwigwe.

⁷ Henza, ngubaa lukwiri, “Kigiri vusaliri!” Nzanira sindivulirwa mba, nzanira vudinyu navuzwa likalaga lirungi siliveeye ho mba.

⁸ Anyinyi inzira yange kunangwa mburi kuvita, kandi uviiki kisundi mu zinzira ziange.

⁹ Utulizi vukumi ku inzi, kandi utulizi itaji ku mutwi gwange.

¹⁰ Umali kuunduvulanyia kutura ku zimbega ziosi, na ndigaye mwene; kandi wiihi lisuuvirizwa liange kuli musaala.

¹¹ Nyasaye umali kuviika uvutima vwivwe ku inzi, kandi umbalizi kuva kuli musigu weve.

¹² Amahi geege gaaza harara kunyingilira, viivungizi harara munzira yange. Vumbaki hokososa haavo kukumbiriza inyumba yange.

¹³ Nyasaye uviiki avamwavo vange ihale kutura ku inzi. Na vakwamanyana navo vakoleywi avageni ligali ku inzi.

¹⁴ Aviiko vange vaziyi ihale, na valina vange va himbi vaanziviliyi.

¹⁵ Avandu vamenya munyumba yange vamali kunzivilira; na vatumikiri vange avakali vambalizi kuva mugeni kuvo.

¹⁶ Lwa naangaa mutumikiri wange, siyandivuliraa mba. Kali lwa mugoonyaa yangonye si yambuliraa mba.

¹⁷ Mukali wange sianyala kwikuzira ku vugundu vwu mwika gwange mba, Kandi avamwavo vange vene sivanyala kwisunda ahimbi niinzi mba.

¹⁸ Kali avana vadoto vaandegeriza; kali lwa singiraa vamulomaa vudamanu ku inzi.

¹⁹ Avalina vange vosi viligali vandunyiraa, kandi yavo avandayaanza ligali kuvita, vaang'irung'ani.

²⁰ Ligodo liange lihandi ku vigumba viu muvili gwange. Mali kohononoka mu kivi yiki inyima wokogotiza viosi.

²¹ O, munyi avalina vange, mumbererere! Kigira, mukono gwa Nyasaye gumali kunduya!

²² Kigira ki munyi mundambizaa kuli Nyasaye akolaa? Kigira ki mu zizagiliraa kuundambiza?

²³ O, Vwakaveeye vulahi makuva gi lielilira liange nigakang'odeywi! O, vwakaveeye vulahi nigakang'odeywi mu kitabu!

²⁴ O, vwakaveeye vulahi nigakang'odeywi ku lwanda ni kilamu yikivia ni lisasi, Nukuvazwa ku lwanda gaduuki kuhindira mihiga ni mihiga.

²⁵ Inzi manya ndi muhonyi wange aveeye mwoyo, alaza lwukumaliriza kung'inga.

²⁶ Na inyima wi ligodo liu muviri gwange limali kwononywa nuvulwaye, Ndakalole Nyasaye moni na moni ningikiri mu muviri yigu.

²⁷ Na inzi mwene ndakamulole moni namoni, kandi sialakave mugeni ku inzi mba. Mwoyo gwange guukuzi.

²⁸ Uvuluviliri vwange vwageha, kigira mwavoora; “Kunyala ndi kumudambiza? Mwenya kivuni chu kwingilira inzi.”

²⁹ Navuzwa muve nu vuti ku kivavi, kivavi keleetaa uvutima vwa Nyasaye ku vwoni; kunangwa muduuki kumanya ndi mukalagi aveeye ho.