Ayubu 17 - KITABU KITAKATIFU

¹ Keheri chi livamwoyo liange keveeye ahimbi, sinyala koherana kandi mba. Kirindwa chetegeki kumbugura.

² Avandu vasekeriza havundu hoosi, kandi mbenzaa vandu vanyingi nivangolera kehenyahenye.

³ O, Nyasaye, inzi mbeeye musuuvirifu, yaanza uvugiliri makuva gange. Siaveeyeho mundu wundi woosi unyala kudinyiriza amakuva gange mba.

⁴ Kigira ivi umali kukunika zing'anagani ziavo kulivula kumanyiriza, utaleka vanguuti mba.

⁵ Niiva mundu alazaama mulina weve aduuki konyoora mabese, avana veve valanyora uvudinyu.

⁶ Nyasaye yangoleye ekehenyahenye, kunangwa avandu vaseke, vazaa ni vatuuza amate mu zimoni ziange.

⁷ Zimoni ziange zimali kozengera kigira vovereri vwange; vivero viange viang'era kuli kisala.

⁸ Yavo avaganaganaa vaveeye avasuuvirifu, vaveeye ni ligenya, kandi vangalagira kuli utaatia Nyasaye.

⁹ Navuzwa mundu mulungi sialikigatira muzinzira zizie mba, oyo oveeye mulahi alazizagilira kuva nizinguru.

¹⁰ Navuzwa niiva vandu yava vosi valaza kusingira imbiri wange, sindanyoola kali mulala kuvo wo vogeri mba.

¹¹ Madiku gange gafeye, lilohiza liange liheri, kandi lisuuvirizwa liange ligoti.

¹² Navuzwa avalina vange vavola ndi, uvudiku voveeye umbasu; vavoolaa ndi uvulavu vuveeye ahimbi, navuzwa inzi manya ndi mbeeye vuzwa mu kisundi.

¹³ Lisuuvira liange liveeye kihadisi uwa ndigona mu kisundi.

¹⁴ Ndavolera kilindwa ndi, ivi oveeye kuli baba wange, kandi ndaavolera zing'ende ziliizaa inzi ndi, “Ivi oveeye mama wange na mbozo wange.”

¹⁵ Lisuuvirizwa liange liveeye haliha? Nivwaha unyala kolola lisuuvirizwa liange?

¹⁶ Lilasulungutaa kuduuka mu kirindwa? Liliika harara ninzi kuduuka mu luguchi?