Ayubu 16 - KITABU KITAKATIFU

Ayubu

¹ Maku Ayubu yativura navoora,

² Inzi mali kuhulira makuva manyingi kuli yaga, navuzwa lileminya mwoyo lienyu lia muhaana liveeye vuzwa vudinyu.

³ Munyi mulazizagilira kumoloma vugira kuduuka ku keheri? Muladuuka kuva kazozo ni likuva liu kumaliriza?

⁴ Niiva munyi mwakaveeye inzi, na inzi niiva ndakaveeye munyi, ndakavooye makuva goosi ga munyi muvooraa ku inzi. Ngano ndakamuvooleye makuva gokogenyia nu kuzizagilira kumusung'usira mutwi gwange.

⁵ Ngano ndakavadinyirizi na makuva gange, nu kuvaleminya mioyo.

⁶ Navuzwa nimoloma vuzunu vwange si volekeraa mba; nichiring'ana si volekeraa mba.

⁷ O, Nyasaye, kalunu umali kundiviza, kandi umali koleka vandu vi inyumba yange kwitwa.

⁸ Umali kungumberiza ligali, kandi umali kugwa musigu wange. Mali kungaha kandi avandu vavuguye yaga kuva kelolekizu ku vudamanu vwange.

⁹ Umali kundunyira nu kundandulanyia kuli inyama yu muvulimu; udedeyizi amiinu googo ku inzi, na musigu wange yaanzumiki ligali. Vahambani harara kunyingilira.

¹⁰ Avandu viivungizi na kovora makuva gaavo ku inzi, vigingiraa nukumbama zinzasaya.

¹¹ Nyasaye umali kumbika imbiri wa vandu vatamumanyi, kandi kumbika mu makono ga vandu vachamu.

¹² Inzi ndaali nemenyi mu murembe, navuzwa Nyasaye yavugula ku ligoti liange, naalivunaganyia mu vidonye, ni yambika kuva ninzi wayenya alase,

¹³ avalasi vu vuta veve vangumberizi; yandoza nu kusaliriza ligali vugira kombererera, yaatanya zimbigu ziange, na indulwi yange yasunduka ku lirova.

¹⁴ Yaandulira kuli musikari, nu kunzata zing'oma yaaha naha.

¹⁵ Inzi siomaa ninziviki zinguvu zia magunia, nzikaye hano mu luguchi ninguutinywi.

¹⁶ Mali kulira maliga kuduuka zimoni ziange ziakanyi, kandi zivimbi ligali, na ndolaa viriri.

¹⁷ Kali vutindi ni vutaveeye mu inzi, lisaala liange liveeye lirungi imbiri wa Nyasaye.

¹⁸ O, Munyi avandu vi lirova, mutavisa vudamanu vwange mba! Kandi mutaleka lianira liange lie likalaga lirungi livuli kuhulilika mba!

¹⁹ Kali kalunu ndi, mulolekizi wange aveeye mwigulu, kandi anyala kumolomera nu kukinga inzi.

²⁰ Avalina vange vaasekeriza, kandi ndiraa maliga ku Nyasaye.

²¹ Ndakayanzi mundu yangoonyere ku Nyasaye, kuli mundu agoonyeraa mulina weve.

²² Mihiga jange jivitaa, ndazia kunzira ya ndakavuli kwirana ku kandi mba.