Ayubu 13 - KITABU KITAKATIFU

¹ Henza, zimoni ziange ziloli yaga goosi, kandi matu gange gahuliye nu kumanya goosi.

² Goosi agamumanyi, inzi kandi mali kumanya. Inzi si mbeeye mukekeeke ku munyi mba.

³ Navuzwa inzi ndakayanzi kovolerana na Nyasaye Wuvunyali, kandi ndakayanzi kuhaana vivuni viange kuye.

⁴ Munyi mwosi muveeye avandu vamakuva gu vugadi, kandi muveeye kuli avaahi vi zinyasi avatanyala kohonyia mundu mba.

⁵ O, vwakaveeye vulahi munyi kuchiring'ana machiriri, gene yago gakaveeye ovogeri ku munyi.

⁶ Kalunu muhuliri livoora liange, kandi muhulirize ku ligoonya liange.

⁷ Kigira ki munyi muvooraa ovovehi? Muganaganaa uvugadi vwinyu vulakonya Nyasaye?

⁸ Mulayanzilira kovoora agaveeye malungi imbiri wa Nyasaye? Kandi mulamoloma kumiveera mu kiyaalo?

⁹ Niiva Nyasaye yakahenzerizi mu liiva lienyu liosi, mulaloreka valungi imbiri weve? Muganaganaa munyala kugaada Nyasaye kuli mugadaa vandu?

¹⁰ Ligali Nyasaye alamugondokera niiva mumanyia liyaanzilira vandu mu vwivisu.

¹¹ Uluyali lwilwe lulavula kumutiihiza, kandi litihiza lilie linene lilamugwira?

¹² Livoora liu kwizuliza lie zing'ano zienyu, liveeye kuli ligoke, lihing'ana lienyu liveeye lidedekere kuli ovodohi.

¹³ Muchiring'ane na m'mbe vwiyangu nduuki kumoloma, na muleke gakolekaa ma gakoleke.

¹⁴ Kigira ki nziviika mu vuhimwa inzi mwene? Kandi kuviika livamwoyo liange mu vudinyu?

¹⁵ Kali niiva Nyasaye alaanzita, inzi ndava ni lisuuvira muye, kandi ndalungikiza inzira yange imbiri weve.

¹⁶ Yaga galava ovohonyi vwange ndi, kigira mundu muchamu sialasingira imbiri wa Nyasaye mba.

¹⁷ Muyanze muhulirize livoora lia makuva gange, na lingili ligali mu matu ginyu.

¹⁸ Henza, kalunu mali kwetegekiza livoora lia makuva gange, kigira inzi manya mbeeye mulungi imbiri wa Nyasaye.

¹⁹ Nivwaha oveeye ho unyala kuhing'ana na inzi, niiva ni ndio, inzi ndachiring'ana machiriri nu kukuza.

²⁰ Inzi sindivisa imbiri woovo mba Nyasaye niiva ulamba vindu viviri yivi:

²¹ Lekera kuhaana amageri ku inzi, kandi utulizi vutihizi vuvwo ku inzi.

²² O, Nyasaye, yaanza umolome na inzi, na ndakutivulira; anoho yaanza oleke molome na ivi undivuliri.

²³ Uvwoni vwange nu vudamanu vwange ni vuli? Ongole nduuki kumanya vwoni vwange nu vudamanu vwange.

²⁴ Kigira ki wivisaa kutura ku inzi? Kandi kigira ki umbalizaa kuva kuli musigu woovo?

²⁵ Ogerizaa kundihiza? Inzi si mbeeye kindu navuzwa liitu liu musaala, kandi wingiliraa livivi liumu.

²⁶ Ivi umbika muviyaalo vilulu, kali ku makuva gandakola ningikiri musoleri.

²⁷ Ivi ovohi virenge viange ni minyororo, kandi ohenzelerizaa ligenda liange, kali ohenzeriza zinduvatiru zie virenge viange mu zinzira ziange ziosi.

²⁸ Kigira yaga ligodo liange lilandulukaa kuli musaala guguundaa; kandi kuli inguvu yi zisere zialia.