Ayubu 12 - KITABU KITAKATIFU

Ayubu

¹ Maku Ayubu yativura, navoora,

² Lihayahayiza si liveeyeho mba, munyi muveeye avandu, na ovogeri vulakuza namunyi.

³ Navuzwa inzi mbeeye nilimanya kuli munyi; si mbeeye mukekeeke ku munyi mba, vuli mundu amanyi vindu viosi viumali kovora.

⁴ Kali avalina vange vaasekaa kalunu; kali niiva mbeeye mundu mulungi, utaveeye nimbara; navuzwa ing'inga yaali ho lwa Nyasaye yahaana amativuli ku lisaala liange.

⁵ Munyi si muveeye nu vudinyu mba, navuzwa mungoleraa kehenyahenye; muduyaa mundu oveeye ahimbi kugwa.

⁶ Avanuuli vaveeye nu murembe, kandi avavihirizaa Nyasaye, vaveeye mu vulindi vulahi kandi mu mirembe, nyasaye wavo ni zinguru ziavo.

⁷ Kali amanyonyi gu mwigulu, ni zinyama ziu m'mbulimu zilakwigiza.

⁸ Teeva misaala jo mulirova jilakwigiza; kandi zisuzi ziu munyanza, zirakovoolera.

⁹ Nivwaha ku yava vosi utamanyi ndi mukono gwa Yahova gumali kokora yaga?

¹⁰ Zinguru zia Nyasaye ziveeye mu livamwoyo lia vuli kelombe, kandi mu livamwoyo lia vuli mundu.

¹¹ Navuzwa gaveeye vuzwa kuli lulimi luyaanzaa kuzazama chukulia, kandi ndio ugutu guyaanzaa kuhuliriza amakuva.

¹² Avakulundu vaveeye no vogeri, madiku manyingi gi limenya liavo galetaa limanya.

¹³ Nyasaye aveeye no vogeri kandi ni zinguru, kandi aveeye nilimanya lia amakuva gu kwideera.

¹⁴ Niiva Nyasaye alasambula, siaveeyeho nu mundu unyala kwumbaka kandi mba, niiva alaviika mundu mu vuhambe, siaveeye nu unyala kumutuliza mba.

¹⁵ Kemeyi kiduukaa lwa yigalira imbura, na lwa aleetaa imbura, amazi gizuraa.

¹⁶ Nyasaye aveeye wi zinguru kandi wi liguuta, uyu ugadwa kandi umugadi, vombi vaveeye mu zinguru zizie.

¹⁷ Nyasaye atulizaa ovogeri ku avideeri, kandi alombaa avakalagi kuva kuli avasiru.

¹⁸ Nyasaye atulizaa avami ku zindeve ziu vwami, nu kuvakola avahambe.

¹⁹ Nyasaye agehizaa vasaalisi na vasaza vizingulu.

²⁰ Nyasaye atulizaa ho livoora lia vasaza vaveeye avasuuvirifu, kandi atulizaaho limanya lia avakulundu.

²¹ Nyasaye aviikaa zisoni ku yavo avaveeye avanene, kandi aherizaa zinguru zia avamihi.

²² Nyasaye avuulaa vindu viu mululiva kutura mu kisundi, kandi aleetaa uvulavu ku kisundi kenene.

²³ Nyasaye alombaa zihiiri kuva zie zinguru kandi zinene ligali, kandi azidiviza; avambalarizaa zihiiri kandi azituliza ho.

²⁴ Atulizaa ho limanya kutura ku avamihi va avandu vi kivala, kandi avoloomba kogendagenda mu changarangwi hataveeye ni inzira kali indala;

²⁵ vahavatizaa mu kisundi; kandi vagoyana kuli avandu vahambiki.