Ayubu 10 - KITABU KITAKATIFU

¹ Mwoyo gwange guluhi nilimenya. Ndamoloma havulavu kigira lielilira liange, kandi ndamoloma nu vutima vwu mwoyo gwange.

² Nyasaye, utangalagira mba; Ombolere ni vudamanu ki vujira nungalagira?

³ Gaveeye vulahi ku ivi kuundambiza, nukuchaya mundu wa umali kolomba kandi nukuyaanzilila lilohiza lia vandu vachamu?

⁴ Ivi ololaa vindu kuli mundu alolaa? Kandi oveeye ni zimoni kuli ziu mundu?

⁵ Madiku googo gaveeye amimbi kuli madiku gu mundu, anoho livamwoyo liilio liveeye limbi kuli livamwoyo liu mundu?

⁶ Kigira ki otevelizaa ligali uvudamanu vwange, kandi wenyelizaa uvwoni vwange?

⁷ Ivi umanyi ndi singoli kindu kidamanu mba, kandi siaveeye ho nu mundu kali mulala unyala kombonyia kutura ku ivi mba?

⁸ Makono googo gaanoomba kandi ganoonga; kandi kalunu umali kungirung'ana nukundiviza.

⁹ Wizulizi ndi ivi wanomba kutura ku madohi, kandi ulashonoranyia kunziranyia mu luguchi?

¹⁰ Kuli mundu alombaa zingonye zia maveere mu kimuga; ivi wanomba munda mwa mama wange.

¹¹ Ivi walomba muviri gwange harara ni vigumba viange kandi nimichi. Wakunika vigumba viange ni zinyama kandi ligodo.

¹² Ivi ombeeye livamwoyo kandi nu vuyanzi vutaveeye ne keheri; kandi umali kuniinda.

¹³ Navuzwa kalunu manyirizi ligali ndi, ku ing'inga yiyi yoosi, walohiza mu vwivisu kusaliriza.

¹⁴ Ivi wambenzeliza niiva ndakakoli vwoni, kunangwa usuuli kusamiha.

¹⁵ Nonoho lwa inzi ngolaa vwoni, mbeeye mu vudinyu, navuzwa lwa ngolaa vulahi sinyoolaa lizominywa mba. Mbeeye mu vudinyu, kandi ngunikiywi ni zisoni.

¹⁶ Niiva mbeeye ni liguuta liosi, umbiima kuli isimba; kusaliriza, okolaa vindu viokogenyia.

¹⁷ Vuli kazozo, ivi ovezaa na valolekizi ku inzi, omedaa vutima vuvwo ku inzi, kandi olohizaa vuli kazozo kunyingilira vuhia.

¹⁸ Nyasaye, kigira ki noleka ninzivulwa? Vwali vulahi inzi kukuza imbiri wu mundu woosi akikiri kondola.

¹⁹ Vwali vuve vulahi ndiivulwa ninguzi, kandi ndagingwa kutura munda kuzia mu kirindwa, vwali vuve vulahi ndaavura kuva mwoyo.

²⁰ Madiku gi livamwoyo liange gaveeye gageehi? Ndeka mbe! Uleke sangaliri madiku gange gatigaye.

²¹ Nziza vwangu, na si ndirana kandi mba, nziza mu kivala keveeye chi kisundi, kandi chikiriri chilikuza,

²² kivala keveeye chikisundi kandi chiligoyana, wu vulavu voveeye kuli kisundi.