Ayubu 1 - KITABU KITAKATIFU

Setani Yageriza Ayubu

¹ Yaali ho mundu mu kivala cha Uzi, uwalangwa Ayubu. Mundu uyu yaali vugira imbara kandi mulungi, mulala uwatia Nyasaye, nukweleha ku uvudamanu.

² Yaali na vayaayi saba na avakaana vavaga.

³ Yaali na magondi 7,000, zing'amia 3,000, zing'ombe ziukulima 1,000 kandi zibunda 500. Yaali kandi na vatumikiri vanyingi ligali. Yaali mutugi ligali kuvita vandu vandi vosi volovega lwi Ivugwi.

⁴ Avayaayi veve valomba uvufuuva vwukogenihizana mu lilia mu zinyumba ziavo, vuli mulala ku lidiku lilie; na vagenihizaa avakaana vaavo vavaga vaze kulia nukunwa harara navo.

⁵ Lwa madiku gi lilia gakung'anaa, Ayubu yavatumanaa vaze kuye avatakase. Yavuka mugambazuri Mumavwevwe nukuhaana visiuviliru Viukusambwa kuli livaliza liavo kigira yaganagana, “hawundi avana vange vakoli uvwoni nokonyega Nyasaye mu mioyo jaavo vugira kusaavira.” Ayubu yakola ndio kazozo.

Ligerizwa lia Ayubu Liukutanga

⁶ Lwa lidiku liaduuka lie zingelosi va Nyasaye vazia kwimanyia imbiri wa Yahova, Setani naye kandi yazia harara navo.

⁷ Yahova yateeva Setani, “Ivi utura hayi?” Setani yativura, “Inzi nduraa kogenda genda yiyi ni yiyi mu kivala.”

⁸ Yahova yamuteeva, “Ukaloli ku mutumikiri wange Ayubu? Sihali ho nu mundu kali mulala mu kivala oveeye vugira imbara kandi mulungi kuli oyo mba. Atizaa inzi kandi yeleha kutura ku likora vudamanu.”

⁹ Maku Setani yativulira Yahova, “Uganaganaa Ayubu alakusigamira natanyooye kindu kutura ku ivi?

¹⁰ Ivi siwamwevera lugaga ludinyu harara na vandu avinyumba yeeye kandi ni miandu josi ja aveeye nacio? Ivi wamala kugasiza viosi viakolaa kandi imiandu jijie jimali kwizura mu kivala choosi.

¹¹ Navuzwa niiva wakanyiyi mukono gugwo, nukudiviza nukuduya viosi via aveeye navio, alakonyega moni namoni.”

¹² Yahova yavolera Setani, “Vulahi ligali, viosi via aveeye navio viveeye mu zinguru zizio; utasaliriza Ayubu mwene kali hakuzu mba.” Kunangwa Setani yatura imbiri wa Yahova.

Avana vosi nuvutugi vwa Ayubu vwadivizwa

¹³ Lidiku lilala, lwa vayaayi na vakana va Ayubu vaali nivaveeye ni lilia hango ha amwavo wavo mukulundu,

¹⁴ mutumwa yazia ku Ayubu nanyagura. Yamuvolera, “Kwali nikulimaa milimi ni zing'ombe, ni zibunda niziaya ahimbi nazio.

¹⁵ Nonoho Avasabeya vatulira ma niviva ziosi. Viiti sa mulala ku avatumikiri vovo nitali inzi nzieng'ine niyie ohononoki nzize kukoletera makuva.”

¹⁶ Lwa yaali nakikiri kumala limoloma, mutumikiri wundi yaza navoora, “Nyasaye yatuma inguba kutura mwigulu ukwita magondi na avayi. Inzi nzieng'ine niyie ohoni nzize kukoletera makuva!”

¹⁷ Lwa yaali nakikiri kumala limoloma, mutumikiri wundi yaza navoora, “Viduma vivaga via Vakalidea vakunuuyi zing'amia, kandi viiti avatumikiri vovo vosi nikivavi nitali inzi nzieng'ine niyie ohoni nzize kokovoolera amakuva!”

¹⁸ Lwa yaali nakikiri kumala limoloma, mutumikiri wundi yaza navoora, “Avana vovo vaali nivaveeye ni lilia hango hu muyaayi woovo mukulundu

¹⁹ nonoho kihuzuzi kenene chatula numuriviti mu changalangwe nikiduya zikona zine zie inyumba. Inyumba zana yagwa kuvo, ma niviita vosi. Inzi nzieng'ine niyie ohoni nzize kokovoolera makuva!”

²⁰ Maku Ayubu yasingira naatandula zinguvu zizie mu vovereri. Yavega liisu ku mutwi gwigwe, kandi naagwa hasi mamumama.

²¹ Yavoola, “Inzi ndiivulwa vugira kindu, kandi ndakuza vugira kindu. Yahova yahaana kandi Yahova uvuguyi. Lieta lia Yahova lizominywi.”

²² Kali mugoosi gekoleka, Ayubu siyakola uvwoni anoho kudura Nyasaye mba.