Amosi 9 - KITABU KITAKATIFU

Likalaga lia Yahova ku Isiraeli

¹ Ndaalora Yahova nasingiyi ahimbi nu vwali. Yahaana malago navoora, “Ukuya vudinyu mitwi ji zitiru zie Litembeli kunangwa imise jiduuki kodegera. Uvunanyie mitwi zana mu vidonye, ma oleke vigwi ku mitwi ja avandu vosi. Ndaza nzite avandu vandi vosi avamanya vatigale mu vulwani. Mundu kali mulala si aliruka, kandi mundu kali mulala sialahononoka mba.

² Kali niiva valayava hasi kuduuka mu kihadisi ndavagumira. Kali niiva valanina kuduuka mwigulu, ndavilanyia hasi.

³ Kali niviivisa igulu kondongozi yi kiguru cha Karimeli, ndavenyeleriza kuduuka mbagumiri. Kali ni vivisa hasi mu luliva lwi inyanza kutura ku inzi, ndalaga ogoyoka gonene gwu mu inyanza kuvaluma.

⁴ Kali niiva avasigu valavavugula mu kuva mu vuhambe ndalaga viitwi. Mali kotovola kudiviza ligali nu kuvula kuvakonya.”

⁵ Yahova Nyasaye Wuvunyali, adiira lirova ma lidegera; Yavo vosi avamenyi mu lio vasioma. Lirova liosi livuuka kandi ligwa kuli mugera gwa Naili.

⁶ Yahova yumbaka ovomenyo vwivwe mwigulu kandi aviikaa imise javwo ku lirova. Alaangaa amazi kutura mu inyanza nu kugasundula ku lirova kuli imbura. Lieta lilie ni Yahova Nyasaye Wuvunyali.

⁷ Yahova avoora, “Avandu va Isiraeli, simuveeye kuli avandu va Ezopia ku inzi? Sindaleeta munyi avandu va Isiraeli kutura mu kivala cha Egebeti? Sindaleeta Kandi vandu va Filisitia kutura mu kivala cha Kerete na avandu va Siria kutura mu kivala cha Kiri?”

⁸ Inzi, Yahova Nyasaye Wuvunyali, mbenzaa ku vwami vwu vwoni yivu vwa avandu va Isiraeli, na ndavudiviza vutuli mu lirova linu. Navuzwa sindadiviza ligali kisukururwi choosi cha Yakobo mba.

⁹ “Ndalaga, na ndasesa avandu va Isiraeli kuli uvuswage vosesaa koloderu. Ndavasesa hagati hi zihiiri nduuki kutuliza ho vosi avataveeye avalahi avatakonya kindu.

¹⁰ Avuvwoni hagati ha avandu vange valitirwa mu vulwani. Yaavo vosi avaavoolaa, ‘Nyasaye sialaleka uvudamanu vwosi ukuuza himbi ni kunyi.’ ”

Liranywa lia Isiraeli madiku gaaza

¹¹ Yahova avoora, “Lidiku liizaa ndilanyia uvwami vwa Daudi, avoveeye kuli inyumba yaisasuguka nu kugwa. Ndilana kwumbaka vuhia amadigi gayo nu kugakola gave kuli gaali ku maziambiri.

¹² Na ndio, avandu va Isiraeli valaguuta nu kuvugura avandu vaatigara nokohona mu kivala cha Edomu, harara na avandu vi zihiiri ziosi izia avalange avange.” Yahova ulikola ivindu yivi kwekoleka.

¹³ Yahova avoora, “Madiku gaaza lwu vuswage vulamera nu kuviruka vwangu ligali kuvita lwa vogeswa. Makuyu galaviruka vwangu ligali kuvita lwiwaini inyala kolombwa. Vigulu viliidoloka iwaini enolu, nu tugulu twosi tulituruka iwaini yene yeyo.

¹⁴ Ndilanyia avandu vange Isiraeli mu kivala chavo. Valumbaka vuhia amadara manene gaavo gononywa no komenya mugo; valasimika milimi ji mizabibu na valanwa iwaini yajo. Valataga milimi nu kulia makuyu gajo.

¹⁵ Ndiranyia avandu vange Isiraeli mu kivala cha ndaavaha, na sivalatulizwa mu kandi mba.” Yahova Nyasaye winyu umali kovora.