Amosi 8 - KITABU KITAKATIFU

Amalola gi kihinda cha Makuyu

¹ Ndaali na malola gandi kutura ku Yahova Nyasaye Wuvunyali. Mumalola yago ndalora kihinda cha makuyu.

² Yahova yandeva, “Amosi, ololaa ki?” Ndaamutivulira, “Ndolanga kihinda cha makuyu amengu.” Yahova yambolera, “Keheri kiduuki ku avandu vange Isiraeli. Sindagirung'anyia zing'anagani ziange ziu kuvaha amageri mba.

³ Ku lidiku liene yilio, zinyimbu mu Litembeli zilagwa izinyimbu zie lisioma. Halava ni miviri ja vakuzu minyingi havundu hoosi. Na jilateevwa makiriri.”

Nyasaye alahaana amageri ku Isiraeli

⁴ Hulira likuva yili, munyi avakiranyi avadambizanga nokogeriza kudiviza avandu vadaka mu kivala, nukuvasunda kuduuka ku keheri chi lirova.

⁵ Mwevoleraa aveene, “Lihonga liu mweli muhia lilafa ng'inga ki, ku kuduuki kuguliza vuswage vwitu? Kandi lidiku lie Lisabato lilahera ng'inga ki kunangwa kuduuki kuguliza vuswage vwitu kandi? Hene yaho kunyala kuviika vuswage ku vuguli vwi igulu ligali nu kutumikira vibimu viu vugadi nukuviika ziratiri ziu vugadi ukugaada avaguli.

⁶ Kunyala kuguliza ingano itali indahi ku vuguli vwi igulu. Kulanyoola mundu mudaka utanyala kutuunga magovi geege, kali utanyala kutunga uvuguli vwi kilato na kulamugula kuli umutugwa.”

⁷ Yahova, Nyasaye wa Isiraeli, umali kwisuha umwene; kuli mundu wa vandu va Isiraeli vekonyera ku; “Ligali sindivilira miyinzi jaavo midamanu.

⁸ Na kulwayago, lirova liladegera, na vuli mundu omenyi mu kivala alava mu kivi. Kivala choosi kiladengeyizwa, na kilasinuka nukugwa kuli mugera gwa Naili.”

⁹ Yahova Nyasaye Wanyala Viosi avoora, “Lidiku lizaa lwa ndikola iliuva koyeera mu zisa zia mbasu hagati, na ndaleta kisundi ku kivala ing'inga ya mbasu.”

¹⁰ Ndagirung'anyia madiku ginyu giliilia linene kugwa madiku gu kulira nukusioma, nizinyimbu zienyu ziuvusangali zigwi ziukulira novovereri. Ndamulomba muvege mitwi jinyu, na mwiviki zinguvu zia magunia, na mulava kuli aviivuli vasiomera muyaayi wavo muderwa. Lidiku lilava lilulu. Kuduuka ku keheri chalio!

¹¹ Yahova avoora, “Henza, madiku gaazaa; lwa ndituma inzara enene ku kivala. Avandu valava ni inzara, navuzwa itali inzara yi chukulia. Valava nuvuluhu navuzwa sivulava vuluhu vwa mazi, navuzwa vuluhu kigira lihulira likuva liange. Inzi Yahova, Nyasaye Wuvunyali mali kovora.

¹² Avandu valagendagenda nokoyeyema kutura Ivugwi kuduuka Imadioli, na kutura Ivaale kuduuka Isavaalu valanyagula kuzia yaaha na yaaha nivenyereriza likuva liange, navuzwa sivalalinyoola mba.

¹³ Ku lidiku liene yilio, kali vayaayi na vakana vagima valahi valagwa hasi nukukinda kigira vuluhu.

¹⁴ Yavo aviisuhaa ku lieta lia Ashima, umunyasaye wa Samaria, avavooraa, ‘Ku Nyasaye wa Dani’; anoho ‘Kunzira ya Beerisheba’; valagwa na sivalavuka kandi mba.”