Amosi 7 - KITABU KITAKATIFU

Amalola gi Zisigi

¹ Ndaali na malola kutura ku Yahova Nyasaye Wuvunyali. Mu malola yago, ndalora Yahova nalomba kiduma chi zisigi inyima wi kidieli chu vunyasi vwu mwami vwali nivwakatimulwa, na uvunyasi zana nivutangaa kusivuka kandi.

² Mu malola gange, ndalora zisigi nizilizaa vuli kindu choosi ichaali nikivirukaa chi irangi yu vulimu ku kivala maku ndaavora, “Yahova Nyasaye Wuvunyali, yaanza usamihi avandu vovo Isiraeli! Vanyara kohona ndi? Vaveeye vakekeeke kandi vadekere!”

³ Yahova yagirung'anyia zing'anagani zizie navoora, “Agololi sigalakoleka mba.”

Amalola gu mulilu

⁴ Ndaali na malola gandi kutura ku Yahova Nyasaye Wanyala Viosi. Mu malola yago Nyasaye yetegekaa kuha avandu veve amageri nu muliru. Muliru zana gwakaminya inyanza enene isi wi lirova kandi nigutanga lisaamba kivala choosi.

⁵ Maku ndavoora, “Oh, Yahova Nyasaye, Wanyala Viosi ngogonya ligali mwaza oleke! Avandu vovo kisukururwi cha Yakobo valahona ndi? Vaveeye vakekeeke, kandi vadedekere ligali!”

⁶ Yahova Nyasaye Wuvunyali yaagirung'anyia zing'anagani zizie navoora, “Yaga sigalekoleka kandi mba.”

Malola gi Kibimiru

⁷ Ndali na malola gandi kutura ku Yahova Nyasaye Wanyala Viosi; Mugo, ndalora Yahova nasingiyi nikibimiru ahimbi ku lidigi liumbakwa. Na yaali nu mugoye gwi Ikabiro mu mukono gwigwe.

⁸ Maku, Yahova yandeva, “Amosi, ni kindu ki chololaa?” Ndaativura, “Ndolaa mugoye gwi kibimiru.” Maku, Yahova yavoola, “Henza, ngitumikiraa kumanyia ndi avandu vange vaveeye kuli lidigi litaveeye lirungi, iliavedeka. Sindagirung'anyia zing'anagani ziange kandi kuvula kuvaha amageri.

⁹ Havundu hi visukululwi via Isaka vasigamira haladivizwa. Hatakatifu ha avandu va Isiraeli halakolwa chanyi. Ndaheriza vwamihi vwu mwami Jeroboamu mu vulwani.”

Amosi na Amazia

¹⁰ Kunangwa Amazia, Musaalisi wa Bezeli, yatuma likuva ku Jeroboamu, mwami wa Isiraeli, navoora, “Amosi akokoleeye zimbemba hagati ha avandu va Isiraeli. Limoloma lilie lilononyia kivala cha avandu va Isiraeli.

¹¹ Yaga nigo ga Amosi avoora. Jeroboamu aliitirwa mu vulwani, na avandu va Isiraeli valavugulwa kutura mu kivala chavo vahilwe ihale mu liadikizwa.”

¹² Maku Amazia yavolera Amosi, “Oh, ivi muporofeti, wiruki uzie mu kivala chicho chi Ivuyuda wilwaze yo, na oleke vakutuungi ku vwilwazi vuvwo.

¹³ Navuzwa, utaporofeta Bezeli hano kandi mba. Hano haveeye havundu hukusigamira mwami, kandi Litembeli liu vwami.”

¹⁴ Amosi yativura, “Amazia, inzi si mbeeye kulugano lwu muporofeti oporofetaa ku aduuki kutuungwa mba, anoho mwana wu muporofeti, navuzwa mbeeye vuzwa mwayi wi mitugu, kandi mulimi wi mikuyu ji mizabibu.

¹⁵ Navuzwa Yahova yambugura kutura ku miyinzi jange kuli umwayi wi mitugu kandi yambolera, nzie koporofeta ku avandu veve Isiraeli.

¹⁶ Kunangwa kalunu, hulira aga Yahova avoora. Ivi ombolera ndeke kuporofeta kandi mburi kwilwazira novolera avandu va Isiraeli ivindu vidamanu via Nyasaye azizaa kokora kuvo.

¹⁷ Kunangwa, Amazia, Yahova avoora, ‘Mukali woovo alagwa liraya mu lidaala linene kandi avana vovo vayaayi na avakaana valitirwa mu vulwani. Miandu jijo jilagavulanywa nokohevwa avandu vandi; na ivi mwene ulakuzira mu kivala cha avandu vatamanyi Nyasaye. Avandu va Isiraeli navo valavugulwa kutura mu kivala chavo chene nu kuhilwa ihale mu liadikizwa!’ ”