Amosi 6 - KITABU KITAKATIFU

Lidivizwa lia Isiraeli

¹ Oh, vayaayi, kivi keveeye ku yavo averemerizaa mu jerusalemi kandi ku munyi avalolaa muveeye ni mirembe ku kiguru cha Samaria, munyi avasaza vanene ava ihiiri enene yiyi, Isiraeli, munyi ava avandu vazizaa kuvo ukwenya ovokonyi!

² Muzie mulole lidaala linene lia Kaline. Maku muzie Hamazi iliveeye lidaala linene ligali kandi musulunguti mu lidaala linene lia Vafilisitia lia Gati. Uvwami vwavo vwali vulahi kuvita uvwami vwa Ivuyuda nuvwa Isiraeli? Kivala chavo chaali kenene kuvita ichienyu?

³ O, kivi keveeye ku munyi ava muvura kuvugilira ndi lidiku lidamanu liekivi liizaa navuzwa gamukolaa galetaa lidiku yili himbi kirage?

⁴ Oh, vayaye, ikivi keveeye ku munyi kuyavo avagonaa ku vidali via amiinu gi zinzogu, niviinyilira ku zindeve ziavo zie mido, nivalia zinyama zie vimeme vinetu kutura mu chayo, kandi ivimooli kutura mu lugala.

⁵ Muyanzaa ukwimba zinyimbu zia vuzwa ku vukana, mwelomberaa vukana aveene, kuli Daudi.

⁶ Munweraa iwaini ku zibakuli kandi mwivakaa amaguta malahi agafunyanga mwanyu mulahi ligali, navuzwa simusiomeraa lidivizwa lia avandu va Isiraeli mba.

⁷ Kunangwa kalunu mulava avukutanga kuzia mu liadikizwa. Amasavo ginyu galaduuka ku keheri.

⁸ Yahova Nyasaye Wanyala Viosi mu zinguru zizie umali kuhaana lieganihiza lie liesuha yili: “Mbihirirwa luyali lwa avandu va Isiraeli: Ndegelizaa zinyumba ziavo zie lielemeza. Ndahaana amadara gaavo manene harara na avandu vamenyi mugo ku avasigu vaavo.”

⁹ Na niiva vasaza likomi valatigala munyumba valakuza.

¹⁰ Na niiva umwiko usambaa miviri alaza kujiginga kutura munyumba, na ateeve woosi uva nachivisi munyumba, “Wundi mundu akikiri mu harara niivi?” Na avoole, “Awa!” Maku alavoora; “Shii! Kiring'ana! Kutala vuzwa lieta lia Yahova.”

¹¹ Kunangwa, lwa Yahova ahaanaa lilaga, zinyumba zinene nizingekeke ziladuywa ziigwe makindi.

¹² Zibarasi zinyala kunyagula ku lwanda? Noho, avandu vanyara kulima zinyanza ni zing'ombe zilimaa? Navuzwa mumali kugirung'anyia likalaga lirungi kugwa limoloma lie isumu, na uvulungi kugwa uvudamanu.

¹³ Munyi mwigingiraa kigira mumali kugumira lidaala lia Lodebari mwiyizominyaa aveene nimuvoora, “Henza, kunyi kumali kugumira lidaala lia Karinaimu kuzingulu zietu zinene.”

¹⁴ Yahova Nyasaye Wuvunyali Viosi avoora, “Henza, inzi nziza kutuma iliihi lie ihiiri eng'eni na valamwingilira mu kuvugura kivala chienyu. Iliihi yilio lilamudambiza kutura ha kirivwa cha Hamazi kuduuka ku mugera gwe kereremo cha Araba.”