Amosi 5 - KITABU KITAKATIFU

Lilangwa kwiganira

¹ Muhulirizi ku lwimbu lwange lwi lisioma O, munyi avandu va Isiraeli:

² “Mukaana mugima, Isiraeli umali kugwa, kandi sialavuka! Ogooni hasi kumalova, nu mundu sialamukonya kuvuka mba.”

³ Yahova avoora, “Lidaala linene mu Isiraeli litumaa avasikari elefu indala, navuzwa avasikari imia indala viirana; kandi lidaala linene litumaa vasikari imia indala, navuzwa avasikari likomi veng'ine viirana.”

⁴ Yahova avoora ku vandu va Isiraeli, “Mwilane ku inzi na mulahona.

⁵ Navuzwa mutenya Bezeli, kandi mutazia Giligali anoho mutazia Beerisheba; kigira lidaala lia Giligali lilazia lihaminywe na Bezeli lilatigala iliele.”

⁶ Mwenye Yahova, na mulahono. Nimutenya Yahova, aliika hasi ku vandu va Isiraeli kuli muliru. Na muliru gulasamba vandu va Bezeli, nu mundu kali mulala sialagusiminya mba.

⁷ Munyi mudivi avagirung'anyia uvulungi kugwa uvudamanu, avagadaa avandu kutura ku vulungi vwavo.

⁸ Yahova yalomba zing'ereng'ani: Pleiadesi na Orini. Agringanyia kisundi kuva umbasu, na umbasu kuva uvudiku. Alanganga amazi kutura mu zinyanza, nu kugazuka ku kivala. Lieta lilie liveeye Yahova.

⁹ Aleetaa lidiviza ku avizingulu kandi ku zimbinga ziavo.

¹⁰ Munyi mudunyiraa uyu ogodekeraa uvutali vulungi mu vuyaalo kandi muvihiliraa oyo ovola agiligali.

¹¹ Kunangwa mumali kudambiza avadaka nu kuvanura vuswage vwavo. Kigira yaga, simulamenya mu zinyumba zindahi zia magina gavazwa zia mwumbaka, kandi simulanwa iwaini kutura ku mizabibu milahi ja mwasimika mba.

¹² Kigira inzi manyi kuli mahiolo ginyu gaveeye manyingi kandi manyi kuli uvwoni vwinyu voveeye vonene ligali. Munyi mudambiza avalungi nukuvugula viambeti; mwigaliranga avadaka vavuli konyoora likalaga lirungi liavo mu viyaalo.

¹³ Kunangwa oveeye mugeri alakilingana ing'inga kuli yiyi, kigira eveeye ing'inga indamanu ligali!

¹⁴ Munyi mwegombe kokora uvulungi, na mutenya kokora uvudamanu mba, ku muduuki kuva mwoyo. Nandio Yahova Nyasaye Wanyala Viosi wa mahe alava harara ni munyi kuli mumali kovora.

¹⁵ Mudunyili uvudamanu, na muyanze agaveeye malungi, na mulole ndi likalaga lirungi likoleywe mu viyaalo. Hawundi Yahova Nyasaye Wanyala Viosi alaveera avandu veve Isiraeli zimbavasi avatigara mwoyo.

¹⁶ Kunangwa Yahova Nyasaye Wanyala Viosi avoora, “Lilavaho lilira ni lisioma lie liverera mu zinzira zia madaala manene, kali avalimi valalangwa kuzia kusiomera avakuzu na avaveeye nelimanya liokusioma.

¹⁷ Halakave ho ni lisioma mu milimi ji mizabibu. Yaga goosi galekoleka kigira nziza kuhaana amageri ku munyi.” Yahova umali kovora.

¹⁸ O, vayaayi, kivi keveeye ku munyi avegombaa liduka lie lidiku lia Yahova! Kigira ki mwenyanga lidiku lia Yahova? Lilakave lidiku lie kisundi vugira uvulavu ku munyi.

¹⁹ Lilakave kuli mundu wiruka isimba, ma yagana ni iduba! Noho kuli mundu wingiraa munyumba yeeye ma adiira mukono gwigwe ku lidigi, navuzwa enzoka imuluma!

²⁰ Yahova lilaleeta kisundi, na uvulavu sivulavaho mba. Lilakave lidiku lie kisundi ligali vugira vong'ereng'anu.

²¹ Yahova avoora, “Ndunyiraa amasavo ginyu gi idini. Sinyanzizaa na mavugano ginyu gizidini mba.

²² Lwa muletaa ku inzi vihaanwa vienyu viokusambwa, kandi vihaanwa vienyu viu vuswage, sindavivugilira mba; kali sindavugilira vihaanwa vienyu vie mirembe vie zinyama zinolu mba.

²³ Mulekere liyoga lie zinyimbu zienyu; kigira sinyenyaa kuhuliriza mioyojiovukana vwinyu mba.

²⁴ Mu vogono vwi vindu yivio muleke likalaga lirungi lidoloke kuli mugera gwa mazi, na uvulungi kuli mugera munene gwa mazi agalivula kukama.

²⁵ “O, munyi avandu va Isiraeli, mwandetera vihaanwa ni visiuviliru lwa ndamwimilira ku mihiga arubaini mwigendanyama.

²⁶ Navuzwa mumali kusigamira vifananyi via Sakuzi, umunyasaye munene, kandi. Kaivani, umunyasaye we eng'ereng'ani, avamwelombera munyi aveene.

²⁷ Kunangwa, ndakamuhili mu vuhambe mu kivala keveeye engereka wi lidaala linene lia Damasiko.” Yahova wi lieta lilie liveeye Nyasaye Wuvunyali avoora.