Amosi 4 - KITABU KITAKATIFU

Avakali va Samaria

¹ Muhuliri likuva yili, munyi vakali va Samaria, avaveeye vakomelu kuli zing'ombe zia Bashani; avanyangizaa avadedekere nu kudambiza avadaka, avavoolera avasaza vaavo, “Muleete malwa kunwi kuhambiki!”

² Kuli Yahova Nyasaye Wuvunyali umali kwisuuha ku lieta lilie litakatifu ndi, “Madiku gaaza ku munyi lwa kunguswa ni zindoani, na vuli mulala munyi alavugulwa kuli zisuzi ku zindoani.

³ Kandi mulakweswa ahimbi ni lidigi na mulasuvwa ichova kuvitira mu mwanzu gwi lidigi; mundu samulala alazia vulungi nu kwisiuva mwene mu Harimoni.”

Isiraeli vasuura kuhulira Nyasaye

⁴ Yahova wanyala viosi avoora, “Hambi ha Bezeli na mukore uvwoni ku Giligali mumeede kokora uvwoni; na mulete kidieli chi likomi chiinyu vuli mugambazuri, ni zizaka zienyu vuli lidiku lia kavaga.

⁵ Muhaane kisiuviriru chu kusandiza chi migadi ja mamera, na mulandizi amakuva gi vihaanwa viumwoyo gwu kwihana nu vuyanzi. Mulandizi kigira yivi nivio vindu via muyanzaa kokora. O, munye avandu vi kivala cha Isiraeli!”

⁶ Yahova avoora, “Inzi ndaleta inzara, mu madaala ginyu manene goosi, navuzwa munyi simwirana ku inzi mba.

⁷ Kandi lwi vitagwa vienyu vienya imbura, ndaagumira ivule kukuba. Ndaleta imbura ku lidaala lilala, na ndagaya ivule kukuba ku mulimi gundi maniguniala.

⁸ Kulwayago, avandu vamadaala vazia mu madaala gandi vasuuvira valanyora mazi, navuzwa sivanyoola mazi gavaduka mba. Kali ndio simwirana ku inzi mba.

⁹ “Ndaamutumira vukindu vusamba viukulia nukwononyia vitagwa vienyu. Zisigi zialia vitagwa mu milimi jinyu ni vizabibu vienyu kandi milimi ja mizeituni jinyu. Navuzwa munyi simwirana ku inzi mba.

¹⁰ “Ndaatuma vulwaye vudamanu ku munyi, kuli iyandaatuma ku vandu va Egebeti. Ndiita vayaayi vasoleri vinyu mu vulwani, nukuvugula zibarasi zienyu. Ndaaleeta lifunya lidamanu mu amuulu ginyu navuzwa simwirana ku inzi mba.

¹¹ “Ndaadiviza valala ku munye kuli ndaadiviza Sodoma na Gomora. Yavo ku munyi avaahona kuli kegenga chu muliru kituliziywi mu mahiga. Navuzwa simwirana ku inzi mba.

¹² Kulwayago, avandu va isiraeli ndahaana amageri ku munye. Na kigira ndakora yaga; mwegegeke konyoora likalaga liange.”

¹³ Nyasaye niyie walomba vigulu ni imbuza. Nyasaye avuuliraa mundu zing'anagani zizie; agirunganyia umbasu kugwa kisundi. Agendaa igulu wi lirova. Lieta lilie liveeye: Yahova Nyasaye Wanyala Viosi!