Amosi 3 - KITABU KITAKATIFU

¹ Munyi avandu va Isiraeli, muhuliri makuva ga Yahova amali kovora ku munyi ihiiri yoosi yatura mu kivala cha Egebeti;

² “Kuzihiiri ziosi ziokulirova, munyi nivo mweng'ine avadamanya nukuvalinda. Yiki nicho kekolaa uvwoni vwinyu kuva vudamanu ligali. Yiki nicho kigira muhe amageri malulu ligali.”

Miyinzi ju muporofeti

³ Avandu vaviri vanyara kogenda harara nivatavungirani?

⁴ Isimba inyala kuhuuma mu mulitu nitaloli inyama? Isimba esoleri inyala kuhuuma muluhangaywa lwayo nitagumiyi ikindu?

⁵ Linyonyi linyala kugwa mu mutego nigitategeywi? Mutego gunyala kutiguka vugira kutigulwa?

⁶ Kisiriva chu vulwani kinyala kukubwa mu lidaala linene vugira kokora avandu vatie? Kivi kinyala kuduuka mu Lidaala linene ni kitaleteywi na Yahova?

⁷ Ligali Yahova Nyasaye sialakola kindu vugira kuvulira avatumwa, avaporofeti veve agaviswa.

⁸ Lwi Isimba ihuuma, nivwaha unyala kuvula kutia? Lwa Yahova Nyasaye amali kovora, nivwaha unyala kuvula kuporofeta makuva geege?

Lidiva lia Samaria

⁹ Mwilwaze ku zimbinga zio vwami mu kivala cha vandu va Siria, na ku zimbinga zio vwami mu kivala cha Egebeti, na muvoore: “Muvugane harara ku vigulu via Samaria na mulole ligoyana linene ni lidambizwa liayavo avaaveeye hagati havio.”

¹⁰ Yahova avoora, “Avandu yava sivakora agaveeye amalahi mba, avaviika ivindu via vanura nukwivila avandu mu zinyumba ziavo.

¹¹ Kulwayago, musigu alakumberiza kivala kiavo, nu kogehiza zinguru ziavo, nu kwononyia zimbinga ziavo nukulanya zinyumba ziavo.”

¹² Yahova avoora, “Kuli umwayi ahonyia vilenge viviri anoho ugutu gwi ligondi kutura mu munwa gwi Isimba, kandi ndio avakeekeke ku vandu va Samaria valahonywa, avandu avasedemaa ku zindeve zie mido.

¹³ Muhuliri kalunu, ma mwiganihizi visukululwi via Yakobo.” Yahova Nyasaye Wanyala Viosi avoora.

¹⁴ “Ku lidiku lia mbana amageri ku vandu va Isiraeli kigira uvwoni vwavo, ndononyia uvwali vwa Bezeli. Zikona ziosi ziavuli uvwali zilavunagwa nu kugwa hasi.

¹⁵ Ndononyia zinyumba ing'inga yu vukindu ni ing'inga yumbasu mululu. Zinyumba zialombwa ku amiinu gi zinzogu, ziladivizwa kandi vuli inyumba enene iladiva.”