Amosi 2 - KITABU KITAKATIFU

Moabu

¹ Yahova avoora, “Avandu vi kivala cha Moabu vamali kokora uvwoni haali kanyingi, na kigira yaga ndavaha amageri ligali. Sivahaana luyali ku vigumba viu mwami wa Edomu kulivisaamba kuduuka nivigwa ligoke.

² Kunangwa ndatuma muliru ku kivala cha Moabu na gulasamba zimbinga zia Keriozi. Avandu vi kivala cha Moabu valakuzira mu liyoga liu muliviti gwu vulwani na vasikari valakuba lwanga na visiliva.

³ Ndiita mwamihi wa Moabu na vimiliri vosi vikivala yicho.”

Ivuyuda

⁴ Yahova avoora, “Avandu vi Ivuyuda vamali uvwoni haali kanyingi, na kigira yaga ndavaha amageri ligali. Vamali koleka kolegeriza amigizu gange kandi vavuli kugumira amalago gange. Vamali kogotizwa na vanyasaye vuvugadi valala vere ava avavaguuga vaavo vasigamira.

⁵ Kunangwa ndatuma muliru ku Ivuyuda na ndasamba zimbinga zie lidaala linene lia Jerusalemi.”

Likalaga lia Nyasaye ku Isiraeli

⁶ Yahova avoora, “Avandu va Isiraeli vamali kokora uvwoni haali kanyingi, na kigira yaga ndavaha amageri ligali. Vaguliza avandu vasuuvirifu avatanyala kutuunga magovi ga vandu, avadaka avatanyala kali kugura kali kilato cheng'ine muvutugwa.

⁷ Vaduvagira, hasi vandu avadedekere na vanyilizaa nukulumba avadaka vatuli kunzira. Mundu na baba weve vagona numukaana mutugwa mulala mwere. Nandio vonogonyiaa lieta liange litakatifu.

⁸ Vuli havundu hu kusigamira, avandu vagona ku zinguvu zindala nzere zia vamali kuvugura kutura ku vadaka kuli kihambiliru cha magovi. Mu Litembeli lia Nyasaye wavo, vanweraamu iwaini ya vamali kuvugura kutura ku yavo avaveeye namagovi ga mabesa gaavo.

⁹ “Navuzwa, gaali kigira munyi, avandu vange, avagira nindiviza Avaamori ligali, avasaza avaari avataambi kuli midaragwa, kandi avizingulu kuli misaala imidinyu kuli muduguyu.

¹⁰ Ndaamutuliza mu kivala cha Egebeti, na ndamwimilira kuvitira mwigendanyama ku mihiga arubaini kandi niimuha kivala cha avandu va Amori kuva kivala chienyu aveene.

¹¹ Ndaatovora valala ku avayaayi vinyu vave avaporofeti, kandi valala ku vasoleri vinyu kuva Avanaziri. Yaga sigaveeye agiligali, O, munye, avandu va Isiraeli?”

¹² Navuzwa mwakora Avanaziri kunwa iwaini, kandi muvalage vaporofeti nimuvooraa, mutaporofeta mba.

¹³ “Navuzwa, kalunu ndamuduvulanyira hasi ligali, na mulakenya kuli ligale liezing'ombe ilizuyi vuswage du.

¹⁴ Kali avanyaguli avizimbiru ligali sivalahononoka mba. Vasaza vizingulu valagotiza zinguru ziavo, na vasikari sivalanyala kuhonyia livamwoyo liavo vene.

¹⁵ Kandi avasaza vovuta sivalasingira, avezimbiru sivalanyagula kwehonyia, kandi vasaza vi zibarasi sivalahonyia livamwoyo liavo, ku lidiku liene yilio.

¹⁶ Kali avasikari vovuluvilili valatonyia vivavi viavo nu kunyagula zimbiru.” Yahova umali kovora.