Amosi 1 - KITABU KITAKATIFU

¹ Yaga na amakuva ga Amosi uwaali mulala ku avayi kutura mu lidaala lia Tekoa, agayalola ku Isiraeli mu madiku ga Uzia mwami wi Ivuyuda, nu mumadiku ga Jeroboamu muyaayi wa Jehoashi mwami wa Isiraeli, mihiga giviri imbiri we lidegera lie lirova. Nyasaye yalolekiza vindu yivi viosi ku Isiraeli.

² Amosi yavoola, “Yahova afumaa kutura mu kiguru cha Ziyoni; nu mwoyo gwigwe guhiligana kutura mu Jerusalemi Vwayiru vulaniala, na vunyasi vwi kiguru cha Karimeli vulagilungana kufwana amalova.”

Likalaga lia Nyasaye ku vatende va Isiraeli Siria

³ Yahova avoora, “Avandu vi lidaala linene lia Damasiko mukivala cha Siria vamali kokora uvwoni haali kanyingi; na kigira yaga, ndavaha amageri ligali vakoleye avandu va Gileadi uvudamanu, vavaduvagiiyi hasi kuli mundu uhulaa vuswage na mavere nu muvango.

⁴ Kunangwa, ndatuma mulilu ku inyumba yu vwami yumbakwa nu mwami Hazaeli, na ndasamba zimbinga zie zinyumba zio vwami vwa mwami Benihadadi.

⁵ Ndavunanyia vilivwa vie lidaala linene lia Damasiko mu Siria nu kutuliza ho avandu vamenyi mu livona lia Aveni na avami va Bez-edeni. Avandu va Siria valahirwa mu vuhambe mu kivala cha Kiri.”

Filisitia

⁶ Yahova avoora, “Avandu va Gaza vamali kokora uvwoni haali kanyingi, na kigira yaga ndavaha amageri ligali. Vavugura ihiiri yoosi ya Isiraeli nivavaguliza kuli vatugwa va Edomu.

⁷ Navuzwa ndatuma mulilu ku madigi gi lidaala linene lia Gaza na gulasamba zimbinga zialio.

⁸ Ndatuliza ho avamihi va amadara manene ga Ashidodi na Ashikeloni. Ndahaana amageri ku lidaala linene lia Ekironi, na Avafilisitia vosi avatigara valakuza.”

Tiro

⁹ Yahova avoora, “Avandu vi lidaala linene lia Tiro vamali kokora uvwoni haali kanyingi, na kigira yaga ndavaha amageri ligali. Vaahira ihiiri yoosi mu vuhambe mu kivala cha Edomu, nasivalinda lilagana liu vulina lia vaomba mba.

¹⁰ Kunangwa, ndatuma muliru ku madiji gi lidaala linene lia Tiro, na gulasamba zimbinga zialio.”

Edomu

¹¹ Yahova avoora, “Avandu vi kivala cha Edomu vamali kokora uvwoni haali kanyingi, na kigira yaga ndavaha amageri. Vaahiima avamwavo vaavo vandu va Isiraeli ni kivavi, na sivaveererera mba. Vutima vwavo sivwaali ne keheri mba. Sivaaloleka vahomati mba.

¹² Kunangwa ndatuma muliru ku lidaala linene lia Temani na gulasamba zimbinga zia Bozira.”

Amoni

¹³ Yahova avoora, “Avandu va Amoni vamali kokora uvwoni haali kanyingi, na kigira yaga ndavaha amageri ligali. Vatanyia zinda avakali vaali ni vavereka mu Gileadi muvulwani nivenya okomeeda zinzako ziekivala chavo.

¹⁴ Kunangwa ndatuma muliru ku madiji gi lidaala linene lia Raba na gulasamba zimbinga zialio. Lirira linene lilavaho mu madiku gu vulwani ni lifuliana kuli kihuzuzi.

¹⁵ Mwami wavo harara na vanene veve valazia muvuhambe.”