3 Yohana 1 - KITABU KITAKATIFU

¹ Inzi Umukulundu, ng'oderaa ivi mulina, muyanze wange, Gayo, wa nyanza agiligali.

² Umulina muyanze, wange saalaa ndi vindu viosi viduuki kuva vilahi ku ivi, kandi ove nu uvulamu vulahi. Kuli manyi, goveeye mulamu mu roho.

³ Ndaali nuvusangali ovonene ligali lwa valala ku vamiitu Vakrisitayo vaduuka hano nivambolera kuli oveeye umusuuvirifu ku giligali kandi kuli uzizagilira komenya kazozo mu giligali.

⁴ Simbeeye nu uvusangari vundi ovonene kuvita yivu mba, nivutaveeye kuhulira ndi, avana vange vamenya mu giligali.

Gayo yizominywa

⁵ Umulina muyanze wange, oveeye umusuuvirifu ligali mu miyinzi josi jokolaa kokoonya avaamitu Vakrisitayo kali nivaveeye avageni.

⁶ Vamali kololekiza vuyanzi vuvwo imbiri wi likanisa liveeye hano. Nuyanza, uvakonye vaduuki kuzizagilira ku logendo lwavo mu liiva linyala kuyaanziza Nyasaye.

⁷ Vaatura kuzia ku zing'endo ziavo mu uvuyinziri vwa Kristo vugira kuvugilira ovokonyi vwosi kutura ku vandu vatasuuviraa.

⁸ Kunangwa kunyi Avakristayo, gakuduukiraa kokonye avandu vaveeye kuli yava, kunangwa kuduuki kusanga harara navo mu miyinzi mu giligali.

Dioterefe na Demeturo

⁹ Ndaang'oda ibarwa inyimbi ku Likanisa yilio; navuzwa Dioterefe, uyanzaa kwekola umwimiliri wavo, siyenya kumbulira mba.

¹⁰ Kunangwa, lwa ndakaaze yaho, ndakavuuli havulavu vindu viosi viayakoli, vindu viukutihiza via avoora ku kunyi kandi ovovehi vwosi vwa avoora! Navuzwa yago sigamuduuka mba; kali oyo mwene siavugiliraa kwingiriza avaamitu Vakrisitayo yavo lwa vazaa mba, kandi kali agayaa yavo avenyaa, nokogeriza kuvakunga vatuli mu likanisa!

¹¹ Mulina, wange muyanze, utiiga kokora kindu ekeveeye kidamanu mba, navuzwa wigi kokora kindu ekeveeye kilahi. Mundu woosi okolaa vulahi atulaa ku Nyasaye; kandi mundu woosi okolaa agaveeye amadamanu, akikiri kolola Nyasaye.

¹² Avandu vosi vizominyaa Demeturo; agiligali gene galolekizaa lizominywa lilie. Yee, kandi kunyi komeeda ku lilolekiza lietu, kandi mumanyi vulahi ndi gakovoola gaveeye giligali.

Mirembe ju kumaliriza

¹³ Mbeeye na makuva amanyingi gokokovoolera, navuzwa si nyenya kokong'odera mu vwiinu ni kalamu mba.

¹⁴ Suuviraa ndaaza kokolola vwangu, mako kulakavolerane harara, moni na moni.

¹⁵ Mirembe jive ku ivi. Avalina vovo vosi vakuchelizi. Haana mirembe ku valina viitu vosi vaveeye yaho.