2 Yohana 1 - KITABU KITAKATIFU

¹ Inzi Umukulundu, ng'oderaa ivi Umukali Mutovole na avana vovo, ava inzi nyanza mu agiligali, kandi siaveeye inzi nzienyine, navuzwa yavo vosi avamanya agiligali vayaanza munyi,

² Agiligali gamenyaa mu kunyi, kandi galava ni kunyi kuduuka mihiga ni mihiga.

³ Zimbavasi, livelererwa, ni mirembe vive ni kunyi kutura ku Nyasaye Baba kandi ku Yeso Kristo, Mwana wa Baba jive ni kunyi mu giligali kandi mu vuyanzi.

Agiligali nu vuyanzi

⁴ Inzi ndaasangara ligali konyoora avalala ku avana vovo vagenda mu giligali, kuli Baba yalaga kunyi.

⁵ Kalunu, ndeva ivi, Umukali muyanze, leka kuyaanzane aveene na vene. Yili si liveeye lilaga lihia lia ng'oderaa ivi mba; navuzwa ni lilaga lia kwaali nalio kutura mu litanga.

⁶ Uvuyanzi vwa molomaa ku ni yivu; komenye kolondekana na amalago ga Nyasaye. Yili ni lilaga lia mwahulira kutura mu litanga ndi munyi vosi, gamuduukira mumenye mu vuyanzi.

⁷ Avagaadi vanyingi vamali kulanda mu lirova, liosi na avandu yava nivo avavura kwiyama ndi Yeso Kristo yaazaa mu liiva liu umundu. Umundu kuli uyu aveeye umugadi kandi umusigu wa Kristo.

⁸ Kunangwa mwilindi munyi aveene muvuli kogotiza vindu yivio via kumali kuyinzilira, navuzwa muduuki konyoora amadanyi ginyu muvuduukiru.

⁹ Umundu uvula komenya mu miigizu ga Kristo, navuzwa naavitilira mu liiva yilio, siaveeye na Nyasaye mba. Mundu uvugilira miigizu yaga aveeye na Baba kandi nu Mwana.

¹⁰ Mundu niyazaa ku munyi nanavula koleta amigizu yaga, mutamwingirizi mu zinyumba zienyu, kandi mutamucheliza mba.

¹¹ Umundu woosi, uchelizaa mundu oyo asangaa mu miyinzi jije midamanu.

Makuva gu Kumaliriza

¹² Mbeeye ni vindu vinyingi kumuvolera navuzwa, si nyenya kong'oda ku karatasi nu vwiinu mba, suuviraa kuuza kumugeniha, kandi kovolerana ni munyi moni na moni, uvuyanzi vwitu vuduuki kudukizwa.

¹³ Avana vumukaana winyu muyanze vakuchelizi.