2 Vatesalonike 3 - KITABU KITAKATIFU

¹ Mulimaliriza, avaamitu viitu, mukusaaliri ndi likuva liu Mwami liduuki kulanda vwangu kandi livugilirwi nu luyali kuli liali hagati hinyu.

² Musaale Nyasaye aduuki kokohonyia kutura ku vandu vachamu kandi avadamanu kigira vosi sivaveeye ni lisuuvira mba.

³ Navuzwa Mwami aveeye musuuvirifu kandi alamuha izingulu nu kumulinda vulahi ku Mudamanu oyo.

⁴ Kunyi koveeye ni lisuuvirizwa linene mu Mwami ndi munyi mukoraa kandi mulazizagilira kokora ivindu via kumulaga.

⁵ Mwami ayaanze yimiliri munyi kuduuka mu limanyiriza linene liu vuyanzi vwa Nyasaye kandi mu vwikuziri vuhaanwa na Kristo.

Lieganihiza ku vugata

⁶ Avaamitu viitu, kumulaga mu lieta liu Mwami wiitu Yeso Kristo, mwiyahuli ku avamwavo vosi avamenyi mu liiva liu vugata kandi avatalondaa amigizu ga kwavaha.

⁷ Munyi aveene mumanyi vulahi ndi gamudukira mukore kuli aga kwakora. Kunyi sikwaali avagata lwa kwaali harara ni munyi mba.

⁸ Kunyi sikwaalia chukulia chu mundu kali mulala vugira kutuunga mba. Navuzwa muvogono yivwo kwanyangana kandi nikuyinzira vudinyu. Kwazizagilira kuyinzira vudiku nu mbasu kunangwa kuvuli kumina mundu kali mulala ku munyi.

⁹ Kwakora yaga sigali kigira sikoveeye nu vunyali konyoora ovokonyi vwinyu, navuzwa kigira kwenya kuva kelolero cha munyala kolonda.

¹⁰ Lwa kwaali harara ni munyi, kwamenya ni kumuvolera ndi uyu utayinzira, atavugilirwa kulia ichukulia mba.

¹¹ Kovora yaga kigira kunyi kuhuliraa ndi vaveeye ho avalala ku munyi avamenyi nilimenya liu vugata, avavuraa kuyinzira, navuzwa ukwiyingiriza mu makuva ga vandu vandi.

¹² Ku lieta liu Mwami Yeso Kristo, kulaga avandu yava kandi kuviganihiza vamenye liiva liveeye lilahi kandi vaduuki kuyinzira vudinyu kwenyolera viukulia viavo aveene.

¹³ Navuzwa munyi, avaamitu viitu, mutaluha likora amalahi.

¹⁴ Hawundi mulala alasura kuhulira likuva lia kutumaa ku munyi mu ibarwa yiyi. Nigava ndio, mu manyirizi mundu oyo, mutava ni lihambana naye mba, kunangwa aduuki kuva esoni.

¹⁵ Navuzwa mutamuvugula kuva umusigu mba, navuzwa mu mwiganihizi kuli aveeye mulala ku vandu vasuuvira.

Amakuva gukumaliriza

¹⁶ Kalunu Mwami mwene oveeye uvutangiliru vwi mirembe amuhe mirembe zing'inga ziosi kandi munzira yoosi. Nyasaye amuhe mirembe.

¹⁷ Inzi, Paolo, ng'oda ibarwa yiyi nu mukono gwange mwene, kandi mbikaa muhuri ku vuli ibarwa yange, ya ng'oda.

¹⁸ Zimbavasi ziu Mwami wiitu Yeso Kristo zive harara ni munyi mwosi.