2 Vatesalonike 2 - KITABU KITAKATIFU

¹ Kolondekana ni liza liu Mwami wiitu Yeso Kristo kandi ku liletwa harara lietu kuva naye: Ku mugoonyaa avaamitu, viitu,

² muvuli kogoyaanywa vwangu muziganagani anoho kohendizwa umwoyo ni livoora lia vandu ndi Lidiku liu Mwami limali kuduuka. Hawundi gaganaganwa ndi kwavoola yaga lwa kwilwazaa anoho kwaporofetaa; anoho lwa kwaling'oda mu ibarwa.

³ Mutaleka umundu kali mulala amugaade munzira yoosi. Kigira Lidiku yilio si lilaaza, kuduuka uvwibaali vwukumaliriza vwekoleka kutanga, kandi Muchamu aloleke, uwakalagirwa kuzia kudivizwa mu gehena.

⁴ Alahing'ana na yivio viosi ivilangwa nyasaye, anoho viosi visigamirwa; na aliviika umwene kuva igulu wavio viosi. Alingira nu kwikala mu Litembeli lia Nyasaye, nu kwekola umwene ndi aveeye Nyasaye.

⁵ Mbeeye ni lisuuvira ndi mwizulizaa lwa ndaali ningikiri nimunyi, ndaamuvolera vindu yivi viosi.

⁶ Kali ndio keveeye ho ni kindu ichigaliranga yiki kivuli kwekoleka kalunu, kandi munyi mwakimanya. Ku ing'inga indahi maku muchamu kolaloleka.

⁷ Muchamu wukutihiza, aveeye ku miyinzi kalunu, navuzwa sialaloleka kuduuka lwa oyo umwigaliraa alitulizwa ho.

⁸ Maku muchamu oyo alaloleka, navuzwa lwu Mwami Yeso aliiza alamwita nu mwika kutura mu munwa gwigwe, nu kumudiviza nu vwaku vwiliiza lilie.

⁹ Muchamu uyu alaza ni zinguru ziosi zia Setani kandi alakola zing'ano ziosi zie vilolekizu kandi viokogenyia, viu vugadi.

¹⁰ Alatumikira kandi uvugadi vwi zing'ano ziosi ku yavo avadivaa. Valadiva kigira vasuura kuyaanza agiligali ku vaduuki kohonywa.

¹¹ Nyasaye avaleeteraa zinguru zie ligota kuyinzira muvo ku valomba vasuuviri agaveeye go vovehi.

¹² Kunangwa vosi avavulanga kusuuvira agiligali, navuzwa nivayaanza kokora uvwoni vakalagirwa.

Mwatovolwa Muduuki Kohonywa

¹³ Navuzwa gakuduukiraa kuhaana lisandiza ku Nyasaye kazozo kigira munyi, avaamitu, munyi avu Mwami ayaanza. Nyasaye yatovola munyi kutura ing'inga yukutanga mu nyoore ovohonyi mu litakaswa lia Roho nu mu lisuuvira agiligali.

¹⁴ Nyasaye yamulanga kuvitira mu Ivangeri ya kwamwilwazira. Yamulanga muduuki konyoora vukumi vwu Mwami wiitu Yeso Kristo.

¹⁵ Kunangwa avaamitu viitu, singiri vudinyu nu vuluviliri. Mulonde amigizu ga kwamwigiza, nigava ku lilwaza lietu, ku makuva giitu anoho ku ibarwa yitu.

¹⁶ Mwami wiitu Yeso Kristo mwene, na Nyasaye Baba wiitu uwakuyanza kandi kuvitira mu zimbavasi zizie naakuha kelemamwoyo chi mihiga ni mihiga kandi lisuuvira lilahi,

¹⁷ aleminye mioyo jinyu nu kumudinyiriza mukore imiyinzi josi imilahi kazozo kandi kovora makuva goosi amalahi.