2 Vatesalonike 1 - KITABU KITAKATIFU

Lisandiza ni Lisaala

¹ Inzi Paolo, Sila na Timateo, Kong'odera munyi avandu vi likanisa liveeye mu Tesalonike, avaveeye ava Nyasaye Baba wiitu, kandi Mwami wiitu Yeso Kristo:

² Nyasaye baba wiitu ayaanze ahaane ku munyi mirembe ni zimbavasi kuvitira ku Mwami Yeso Kristo.

³ Avaamitu viitu, gakuduukiraa kusandizi Nyasaye ku kazozo kigira munyi. Gaveeye amalungi ku kunyi kokora ndio, kigira lisuuvira lienyu limedeka ligali. Kandi uvuyanzi vwu mundu sa mulala aveeye navwo ku wache vomedeka.

⁴ Kulwayago, kunyi aveene kwekonya kigira munyi avaveeye mu makanisa ga Nyasaye kigira uvwikuziri vwinyu; kandi lisuuvira lia muveeye nalio, mu lidambizwa lienyu liosi harara nu vusaliri vwa muzizagiliraa kwikuzira mu kazozo.

⁵ Yaga goosi gamanyia ndi likalaga lia Nyasaye liveeye lirungi, na munyi mulavalizwa kuva avaduukani konyoora vwami vwivwe uvugira nimunyoola likubizwa kivi.

⁶ Nyasaye alakola agaveeye malungi: Alatungaa ikivi ku yavo avamukubizaa ikivi

⁷ navuzwa munyi avakubizangwa ikivi mulanyola ovososi ni lielemereriza, kandi ku kunyi ndio. Alakola ndio lwu Umwami wiitu Yeso alolekaa kutura mwigulu harara ni zingelosi veve avizingulu,

⁸ ni zimemo ziu muliru, kuhaana mageri ku yavo avasuuraa Nyasaye, kandi ku yavo avatahuliraa nu kutia Ivangeri yu Mwami wiitu Yeso.

⁹ Valahevwa mageri agaveeye lidivizwa lie mihiga ni mihiga kandi kwavukanywa kutura imbiri wu Mwami kandi kutulizwa mu vukumi vwi zinguru zizie.

¹⁰ Lwa aliiza ku Lidiku yilio konyoora uvukumi kutura ku vatakatifu veve, harara nu luyali kutura ku yavo vosi avasuuviraa, munyi kandi mulakave harara naye kigira mwamala kusuuvira amakuva ga kwamuvolera.

¹¹ Kigira yaga, kumusaalira vuli kazozo. Nyasaye wiitu aduuki kumukola kuva avadukiru mu livamwoyo lia yamulangira komenye. Nyasaye ayaanze atwekizi lienya lienyu liu vulahi, kandi atwekizi miyinzi josi ji lisuuvira.

¹² Muliiva yili lietu liu Mwami wiitu Yeso liduuki kukuminywa kutura ku munyi, na munyi kutura kuye, kuvitira mu zimbavasi zia Nyasaye wiitu kandi ziu Mwami wiitu Yeso Kristo.