2 Vakorintho 9 - KITABU KITAKATIFU

¹ Si gadukanaa inzi ng'odere munyi kigira vokonyi vutumangwa ku vatakatifu vaveeye mu Vuyuda mba.

² Inzi manyi vulahi ndi muveeye nilienya kokoonya; kandi nzekonyaa kigira munyi ku vandu vaveeye mu Makedonia. Ndaavavoolera ndi, “Avaamitu va Akaya vaali nivetegeki kokoonya kutura muhiga gwaavita.” Uvugulu vwinyu vumali kuzuva vanyingi kuvo kuva nu mwoyo gwu kuhaana.

³ Kalunu nduma avaamitu yava, kunangwa liekonya lietu kigira munyi mu makuva yaga livuli kuva lia vuzwa. Navuzwa kuli ndaali nimboye, mwetegeke ligali no vokonyi vwinyu.

⁴ Niiva vandu valala kutura Makedonia valaza harara ninzi, ma vanyoore nimutetegeki, sikulavoola kindu ku munyi mba. Kulava nizisoni kigira kwaali ni lisuuvira linene mu munyi.

⁵ Kunangwa ndaganagana ndi vwakaveeye vulahi koteeva avaamitu yava vatange kuuza ku munyi imbiri wange, vaduuki kwetegekiza imbiri kihaanwa chiinyu kenene cha mwalaga mulahaana. Kihanwa yiki kitava kuli cha muhaanaa ku linigwa, navuzwa kuli cha muveeye ni lienya kuhaana.

Ukumiza nuvuhaani

⁶ Mwizurizi ndi, mundu utaagaa vumwu vokekeeke agesaa vikekeeke; mundu utaagaa vumwu vunyingi agesaa vinyingi.

⁷ Mundu sa mulala, gamudukira ahaane kuli amali kotovola mu mwoyo vugira kuhayahaya anoho kunigwa, kigira Nyasaye ayaanza mundu uhaanaa nu vusangali.

⁸ Nyasaye anyala kumuha munyi vugasu vunyingi ligali, kunangwa muduuki kuva navio viosi via mwenya vuli kazozo; na ndio muduuki kuzizagilira kuhaana mu vunyingi ku miyinzi josi milahi.

⁹ Kuli Amang'oda Matakatifu gavoora, “Ahaanaa nu mwoyo gwosi ku avadaka; uvulungi vwivwe vuhindira mihiga ni mihiga.”

¹⁰ Nyasaye uhaanaa vuguza ku mumizi kandi chukulia chukutumikira alakuha uvuguza vwukumiza vwa mwenya; alavomeda kandi alakiriza ligesa liu vuhaani vwinyu vwosi.

¹¹ Nyasaye alamukola kuva vatugi ku vindu viosi muduuki kuva vahaani zing'inga ziosi, kunangwa vanyingi vaduuki kusandiza Nyasaye kigira vihaanwa vienyu via mwanyoola kutura ku kunyi.

¹² Likora miyinzi milahi yiji sililakoonya vudaka vwa vatakatifu venyine mba, navuzwa lilalomba kandi vandu vanyingi kusandiza Nyasaye mu lizominya.

¹³ Kigira mativuli gu vutumiki vwinyu yivu, avanyingi valakuminya Nyasaye kigira lihulira lienyu liu kwiyama Ivangeri ya Kristo kandi kigira uvuhaani vwinyu kuvo nu ku vandu vandi vosi.

¹⁴ Kunangwa, harara nu vuyanzi vonene vwu mu mwoyo, valamusaavira, kigira zimbavasi ziokogenyia zia Nyasaye amali kumuha.

¹⁵ Gendi kusandizi Nyasaye kigira kihaanwa chiche kitaveeye ne kegero.