2 Vakorintho 5 - KITABU KITAKATIFU

¹ Kumanya ndi inyumba yitu ya komenyi mu kalunu yumuviri gwitu mu lirova lwiisambulwa, Nyasaye alakakohe inyumba mwigulu komenye mu, inyumba ya oyo mwene yumbaka, ihindiraa mihiga ni mihiga.

² Kalunu mu liiva yili, kunyi kokenya kandi kwegomba ligali kuduuki kuvikwa munyumba yitu kutura mwigulu.

³ Kunangwa ni kuvikwa inyumba yene yiyi sikulanyoolwa chahonyo mba.

⁴ Lwa kukikiri mu muviri gwu mu lirova yigu, kokenya ligali kigira kuganaganaa kudambizwaa; sigaveeye kwenyaa kutulizaho umuviri gwi likuza yigu mba, navuzwa koveeye ni liegomba kuvikwa umuviri gutakuzaa, kunangwa muviri gukuzaa yigu guduuki kugirung'anywa ni livamwoyo.

⁵ Nyasaye mwene niyie wakolombera ligirung'anywa yili, kandi yakuha Roho weve, ave kelolero chi vindu viosi via yakuviikira.

⁶ Kunangwa kunyi kwizuyi kelemamwoyo kazozo. Kumanya vulahi ndi lwa kokemenyi hango mu muviri yigu, koveeye ihale kutura ku Mwami.

⁷ Komenyi kigira lisuuvira mu Mwami Yeso; sikomenyi kigira lilola vuzwa mba.

⁸ Koveeye ne kelemamwoyo kandi kwakayaanzi kutura mu muviri yigu ma kuzie komenya harara nu Mwami Yeso.

⁹ Nikuva nikoveeye ho mu livamwoyo yili, anoho mu livamwoyo liu mwigulu, lienya lietu linene liveeye kumuyanziza.

¹⁰ Gakuduukiraa kunyi kwosi kusingira imbiri wendeve ya Kristo yi likalaga, na mundu sa mulala aduuki konyoora likalagirwa kolondekana na malahi, anoho amadamanu ga yakola mu livamwoyo liu muviri gwigwe.

Uvulina na Nyasaye kuvitira mu Kristo

¹¹ Kigira kunyi kumanyi uvulahi vwu kutia Mwami, kogerizaa kokora zinguru kogoonya avandu vavugiliri uvusuuvirifu vwitu. Nyasaye amanya kunyi ligali, ninzi mbeeye ni lisuuvira ndi, mu zing'anagani zie mioyo jinyu, munyi mwamanya inzi vulahi.

¹² Kunyi sikogerizaa kwiyizominya aveene ku munyi kandi mba; nitali, kogerizaa kumuha kivuni kilahi cha munyi mwiyizominyira ku kigira kunyi, kunangwa muduuki kuva ni cha munyala kwekonyera ku kigira kunyi kunangwa muduuki kuva ni cha mutivulira yavo avekonyaa kigira vindu vilolekaa vitaveeye mu mwoyo.

¹³ Niiva kololeka kuva avalalu, yago gaveeye ndio kigira Nyasaye. Navuzwa, niiva ziganagani zio vogeri vwitu ni zindahi yago gaveeye ndio kigira vukala vwinyu.

¹⁴ Vuyanzi vwa Kristo vukwamiihaa, kigira kumanya ligali ndi, umundu mulala yakuzira avandu vosi; agaveeye kovora ndi vosi vaasanga mu likuza lilie.

¹⁵ Yakuzira avandu vosi, kunangwa yavo avaveeye mwoyo vavuli komenya mu liiva liavo vene mba, navuzwa kigira oyo wavakuzira, kandi naasimugukizwa kigira yavo.

¹⁶ Kutura kalunu, kunyi sikukalagiraa mundu woosi kolondekana ni liiva liu muviri mba. Kali niiva ing'inga yindi kwakalagira Kristo kolondekana ni liiva liu muviri mba. Kali niiva ing'inga yindi kwakalagira Kristo kolondekana ni liiva lia vandu kalunu sikokolaa ndio kandi mba.

¹⁷ Lwu mundu woosi, aveeye mu Kristo, aveeye ekelombe ikihia. Henza ivindu viosi via kale vimali kuvita. Na viosi vigwiyi vihia.

¹⁸ Yivi viosi vituraa ku Nyasaye, wakuhambanyia kuye mwene kuvitira mu Yeso Kristo. Yaaha kunyi uvutumwa vwi miyinzi ju kuhambanyia vandu kuye.

¹⁹ Agaveeye kovora ndi, Nyasaye yahambanyia vandu vumukivala kuye mu Kristo. Siavalizaa uvwoni vwavo kuvo kandi mba. Oyo yakuha Ivangeri yukuhambanyia avandu kuye.

²⁰ Kunyi koveeye avatumwa va Kristo; Nyasaye mwene atumikiraa kunyi kogoonya munyi. Kumugoonya mu vogono vwa Kristo, muhambanywe na Nyasaye.

²¹ Kristo siyali nuvwoni mba, navuzwa Nyasaye yamulomba kusanga muvwoni vwitu, kunangwa kunyi kuduuki kusanga mu vulungi vwa Nyasaye muye.