2 Vakorintho 4 - KITABU KITAKATIFU

¹ Mu zimbavasi zia Nyasaye, umali kuhaana ku kunyi muyinzi yigu kokole, kulwayago, sikunyala kukuza mwoyo mba.

² Kuviki halovega vikolwa viu vwivisu kandi zisoni; sikogerizaa kugaada vandu mba, anoho sikovehizaa likuva lia Nyasaye mba. Mu giligali komenyi imbiri wa Nyasaye nikogerizaa kwiyizominya vene mu zing'anagani zia vuli mundu.

³ Niiva Ivangeri ya kwilwazaa sielorekaa mba, eveeye vuzwa inzivisu ku yavo avagotanga.

⁴ Sivasuuvira kigira ziganagani ziavo ziamenya mu kisundi chu munyasaye wi lirova yili. Avakolaa ndio kunangwa vavuli kolola uvulavu vwi Ivangeri yu vukumi vwa Kristo oveeye liiva lie ligali lia Nyasaye.

⁵ Kunyi sikwilwazaa makuva giitu vene mba, navuzwa kwilwazaa Yeso Kristo oveeye Mwami, na kunyi aveene koveeye avatumikiri vinyu kulwa Yeso.

⁶ Nyasaye wavoola, “Leka vulavu vong'ereng'ane kutura mu kisundi,” niyie mulala mwere umali kwakiza vulavu mu mioyo jietu nokoleta limanya liu vukumi vwa Nyasaye uvwakaa mu moni mwa Yeso Kristo.

⁷ Navuzwa kunyi avakoveeye ni livikiru liu mu Roho yili, koveeye vuzwa kuli zinyingu zio vodohi, gaduuki kololeka havulavu ndi, zinguru zinene yizio zitulaa ku Nyasaye; sizitulaa ku kunyi mba.

⁸ Kukubizwa kivi kazozo mu zinzira ziosi, navuzwa sikudivizwa mba. Ing'inga yindi, konyoora vudinyu, navuzwa sikukuzaa mwoyo mba.

⁹ Avandu vanyingi vakudambiza, navuzwa Nyasaye siakolekaa mba. Kali nikozomazomwa hasi kazozo sikudivizwa mba.

¹⁰ Vuli ing'inga kugingaa likuza lia Kristo mu miviri jietu, kunangwa livamwoyo lia Yeso liduuki kololeka mu miviri jietu.

¹¹ Mu livamwoyo lietu liosi kovezaa kazozo mu vuhiimwa vwu kwitwa kigira Yeso, kunangwa livamwoyo lilie liduuki kololeka havulavu mu miviri jiitu ji likuza.

¹² Kunangwa kovora ndi likuza likora miyinzi mu kunyi, navuzwa livamwoyo likora imiyinzi mu munyi.

¹³ Mang'oda Matakatifu gavoora, “Ndilwaza kigira ndaasuuvira.” Lisuuvira liu lugano lulala lwere mu Roho; kunyi kandi kwilwazaa kigira kusuuviraa.

¹⁴ Kunyi kwamanya ndi Nyasaye wasimugukiza Mwami Yeso alakasimugukizi kunyi kandi harara na Yeso, kandi alakakuhili, harara ni munyi imbiri weve.

¹⁵ Yaga goosi gaveeye kigira munyi; kandi kuli zimbavasi zia Nyasaye zilandaa ku vandu vanyingi kandi avandu yavo valameeda lisaala linyingi lie lisandiza kigira vukumi vwa Nyasaye.

Komenya mu lisuuvira

¹⁶ Kigira kivuni yiki, kunyi sikukuzaa mwoyo mba. Navuzwa kali niiva liiva lietu lio muviri liguundaa galaha, liiva lietu liu mu Roho likolwa lihia kazozo.

¹⁷ Lidambizwa lia konyoora lie ing'inga ngekeeke, kandi ni likekeeke vuzwa; lilakakoletere vukumi vonene vwi mihiga ni mihiga kuvita vudinyu vwakonyoolaa.

¹⁸ Kunangwa kunyi sikogoteraa ku vindu vilolekaa mba, navuzwa ku vindu vitalolekaa. Ivindu vilolekaa vimenya ku ing'inga ngekeeke vuzwa, navuzwa vitalolekaa vihindiraa mihiga ni mihiga.