2 Vakorintho 3 - KITABU KITAKATIFU

¹ Kunyi kutanga kandi kwekonya, anoho kwenyaa zibarwa ziu kwimanyia kumunyi, anoho kutura ku munyi, kuli vandu vandi?

² Munyi aveene muveeye ibarwa ya kunyi koveeye nayo, iyang'odwa mu mioyo jietu, na yamanyikana kandi esomwa na vandu vosi.

³ Gaveeye havulavu ndi munyi muveeye va Kristo mwene yang'oda, yayaatuma kuvitira mu kunyi. Kristo siyageng'oda nu vwinu, navuzwa yageng'oda na Roho wa Nyasaye oveeye mwoyo. Siyageng'oda ku magina mavanze, navuzwa mu mioyo ja vandu.

⁴ Kovora yaga kigira lisuuvila lietu lia koveeye nalio mu Nyasaye kuvitira mu Kristo.

⁵ Sigali kunyi koveeye avadukiru kokora umuyinzi yigu ku zinguru zietu aveene, navuzwa vunyali vwitu vuturaa ku Nyasaye.

⁶ Yakokola kove avatumikiri vadukiru vi Lilagana lihia litaveeye lie lilaga liang'odwa, navuzwa lia Roho. Lilaga liang'odwa liletaa likuza, navuzwa Roho ahaanaa livamwoyo.

⁷ Lilaga liavazwa mu zinduguta ku vigaho via magina, vukumi vwa Nyasaye vwaloleka lwa liahaanwa. Kali niiva vong'ereng'anu vwu mumoni mwa Musa vwali nivogehaa, vwaloleka kuva vwizinyulu ligali, kali vandu va Isiraeli sivali vanyara kumwumika mba. Niiva Lilaga liletaa likuza liakazi nu vukumi kuli yivu, maku vukumi vwa Roho aletaa voveeye vonene ligali.

⁸ Miyinzi ja Roho jiletaa vukumi vunyingi ligali.

⁹ Niiva vutumiki vukalagilaa vandu voveeye nu vukumi, vutumiki voletaa vulungi vulava nu vukumi vonene ligali.

¹⁰ Gaveeye giligali ndi lilago liali nuvukumi siliveeye nu vukumi kalunu mba, nivwononyia nu vukumi vwi lilagana liveeyeho kalunu.

¹¹ Niiva kihindiraa ku ing'inga ngekeeke chaali nu vukumi vwacho, maku yicho kihindiraa imihiga ni mihiga kilava nu vukumi vonene ligali.

¹² Kigira koveeye ni lisuuvirizwa kuli yili, kunyi koveeye nuvuluviliri ligali mu limoloma.

¹³ Sikoveeye kuli Musa wafuuma mu moni mwimwe ni kitambaya chasasu, kunangwa avandu va Isiraeli vavuli kolola uvwaku vwivwe nivogehaa mba.

¹⁴ Zing'anagani ziavo ziasiluhalizwa ligali; kandi kuduuka kalunu zing'anagani ziavo ziafuumwa ni kitambaya kilala chere lwa vasoma vitabu vie lilagaa likulu. Kitambaya zana yicho kitulizwa ho vuzwa lwu mundu ahambanywa na Kristo.

¹⁵ Yee, kuduuka lero lwa vasoma vitabu via Musa, kitambaya yicho kikingaa zing'anagani zie mioyo jaavo.

¹⁶ Navuzwa, ing'inga yu mundu agirung'anaa kuuza ku Mwami, ikitambaya yicho kitulizwaho.

¹⁷ Kalunu “Umwami” mu luvaso yilu ni Roho na ha Roho wu Mwami aveeye, ovovoholore voveeye ho.

¹⁸ Kunyi vosi avakwavula kufuumwa mu moni mwitu, kumanyia uvukumi vwu Mwami. Uvukumi zana yivwo vuturaa ku Mwami oveeye Roho akugiruganyia kuva mu liiva lia higulu ligali mu vukumi.