2 Vakorintho 2 - KITABU KITAKATIFU

¹ Kunangwa, ndaatovora mburi kuuza ku munyi gase ndamukora muve no vovereri.

² Niimba nimbereriza munyi, nivwaha unyala konomba sangale nataveeye uyu wa ndaaveleriza?

³ Kivuni chagira ning'oda ibarwa yeyo chaali ndi, lwa nziza yaho kuluuta munyi, mburi kuva ni livererizwa na yavo avenyekaa vanyaanzize. Mbeeye ni lisuuvira ndi lwa mbeeye nu vuyanzi, kandi munyi mwosi muveeye nu vuyanzi kuli ndio.

⁴ Ndaamung'odera ibarwa yeyo kuturana nu vudinyu vonene no vovereri mu mwoyo kandi namaliga manyingi. Lienya liange si liali kumuvereriza mba, navuzwa kokora munyi mumanye ndi ndaamuyaanza ligali vosi.

Uvusamiihi ku mundu umali kwona

⁵ Kalunu niiva aveeye mundu umali kovereriza wundi, siavererizi inzi mba, navuzwa avererizi munyi mwosi, na sinyanzaa kuva mululu ligali kuvita kegero mba.

⁶ Amageri ga yanyoora kutura ku vandu vinyu vanyingi gamuduuki.

⁷ Nivulahi munyi musamiihi mundu oyo kandi mumuleminye mwoyo, avuli kovelera no koleka lisuuvira.

⁸ Kunangwa mugoonyaa, mumumanyie mwamuyaanza.

⁹ Ndaamung'odera ibarwa yeyo kigira ndeenya kumanya niiva mwasingira vudinyu ku magerizu kandi nduuki kumanya niiva muveeye avetegeke kolonda miigizu gange kazozo.

¹⁰ Nimusamiiha mundu woosi ku chaakoli, inzi kandi ndamusamiiha. Niiva nyenya kusamiiha ligali samiiha imbiri wa Kristo kigira munyi,

¹¹ kunangwa Setani avuli konyoora uvwiyangu vwu kuguuta kunyi, kigira kwamanya lienya lilie kuli liveeye.

Lisosa lia Paolo mu Turoasi

¹² Lwa ndaaduuka mu Turoasi kwilwaza Ivangeri kigira Kristo, ndaadegela ndi Mwami yaali niyiguuyi ikiliango chi miyinzi wene yeyo.

¹³ Navuzwa ndaadegela ligali, kigira sindanyoola amwavo wiitu Tito mba. Kunangwa ndavasivula vosi ninzia Makedonia.

Kristo ahaanaa liguuta

¹⁴ Navuzwa, lisandiza live ku Nyasaye ukwimilira kazozo mu logendo lwi liguuta mu Kristo. Nyasaye akutumikiraa kulandiza limanya agiligali ga Kristo havundu hoosi kuli umwayu mulahi.

¹⁵ Kunyi koveeye kuli kimuli kifunyaa mwayu mulahi uguhaanwa na Kristo ku Nyasaye, ugulandaa hagati ha yavo vosi avahonyiangwa kandi ku yavo avadivaa.

¹⁶ Yavo avaagota, umwayu yigwo goveeye uvugundu vwitaa. Navuzwa ku yavo vahonywa, goveeye umwayu goletaa livamwoyo. Nivwaha udukana ni miyinzi yiji?

¹⁷ Kunyi sikoveeye kuli avandu vandi vanyingi, avagulizaa likuva lia Nyasaye mba; navuzwa kigira Nyasaye, umali kutuma kunyi, kovora agiligali imbiri weve kuli avatumikiri va Kristo.