2 Vakorintho 12 - KITABU KITAKATIFU

¹ Kuduuka nzekonye, kali niiva iliekonya zana siliveeye nichalikoonyaa mba. Navuzwa kalunu ndamoloma ku malola ni livuulirwa lia ndaahevwa nu Mwami.

² Manyi yaali ho musaza mulala Mukristayo mihiga likomi nagine jaavita, waavugulwa kuzia kuduuka mu ligulu lia kavaga. Simanyi niyaali mu muviri anoho niiva gaali amalola mba, navuzwa Nyasaye yenyine niyie umanyi.

³ Cha inzi manyi nindi, mundu oyo yavugurwa nazia kuduuka mu Paradiso. Simanyi kandi, niiva vaali mu muviri anoho niiva gaali malola mba. Nyasaye niye umanyi.

⁴ Uwene yeyo kandi, yahulira vindu viagaviswa ligali vitanyalika kovoolwa, kandi vindu viu mundu anyala kuvula kovora.

⁵ Kunangwa, ndekonya kigira mundu kuli uyu, navuzwa sinyala kwekonya Inzi mwene mba, nivitaveeye vindu vingolaa kuva mudedekere.

⁶ Niiva ndakeenya kwekonya, sinyala kuva musiru kali hakuzu mba, kigira ndakava nimbora agiligali. Navuzwa sinyala kwekonya kigira sinyenyaa mundu aganagane inzi kuva munene ligali kuvita vindu vialola mu inzi nukuhulira kutura ku inzi mba.

⁷ Navuzwa konomba mburi kwigingira nu vwelori kigira vindu viokogenyia via Nyasaye yamanyia, ndaahevwa vulwaye vululu ligali ku muviri, ovoveeye kuli umutumwa wa Setani, aduuki kuundambiza kunangwa uvwelori vwange vogehe.

⁸ Haali kavaga kosi, ndagoonya Mwami mu lisaala kigira yaga, kandi nimuteeva andulizili lidambizwa yili.

⁹ Navuzwa litivuli lilie liali, “Zimbavasi ziange nizio zia wenyaa, kigira zinguru ziange ziveeye zindukiru ligali lwa oveeye mudedekere.” Kunangwa, mbeeye nu vuyanzi ligali kwekonya kigira ovodedekere vwange, kunangwa nduuki konyoora likingwa lie zinguru zia Kristo.

¹⁰ Sangala mu vodedekere, amanyego, uvudinyu, lidambizwa nu vudinyu vwosi kigira Kristo. Lwa inzi mbeeye umudedekere, nilwo lwa mbeeye ni zinguru.

Lihenda mwoyo lia Paolo kigira vandu va Korinzo

¹¹ Mbeeye kuli musiru! Navuzwa munyi nivo avanigaa kuva kuli ndio. Munyi nivo avaadukana munzizominyi kigira, kali niiva simbeeye kindu, simbeeye mukekeeke ligali kuvita “avatumwa vaduukiru” vinyu yavo mba.

¹² Vilolekizu vinyingi kandi agokogenyia manyingi ga havulavu galolekizaa ndi inzi mbeeye mutumwa wagiligali, viekoleka hagati hinyu nu vwikuziri vunyingi.

¹³ Ni kindiki cha mwagehera ligali kuvita amakanisa gandi nitali vuzwa inzi mwene sindamukubiza kivi kumuteeva mabese? Nimuyaanza mumbeere zimbavasi ku vudamanu yivu!

¹⁴ Kalunu nzetegeki ligali kuuza kuluuta munyi ing'inga ya kavaga, na sindenya kindu choosi kutura ku munyi mba. Icha nyenya sigaveeye mabese ginyu mba, navuzwa nyenya munyi aveene. Sigoveeye mwima avana kuviikira aviivuli vaavo mabese mu livikiru, navuzwa aviivuli nivo vavikiraa avana vaavo mabese mu livikiru.

¹⁵ Ndayaanzizwa kutumikira viosi viambeeye navio, kali ukwihaana mwene ligali, kigira imioyo jinyu. Kunangwa, munyi mulanyaanza hakekeke navuzwa inzi ndamuyaanza mbitilira?

¹⁶ Munyi mulavugilira ndi inzi sindaali vuliduhu ku munyi mba. Navuzwa hawundi umundu wundi alavoora: “Kigira Paolo aveeye mugadi, uvagumiyi mu vugadi.”

¹⁷ Inzi ndamunyaga kindu mu vugadi kuvitira mu mulala ku yavo ava ndatuma ku munyi?

¹⁸ Inzi ndaagoonya Tito nimutuma ku munyi harara na amiitu wiitu wundi. Tito yamunyaga kindu? Simumanyi kunyi kwimilirwa na Roho mulala oyo mu lilaalira lietu? Simumanyi liiva lietu ni lilala?

¹⁹ Hawundi muganaganaa ndi kuduuka kalunu kwagerizaa kwikinga imbiri winyu! Awa! Kovora vindu yivi imbiri wa Nyasaye nikoveeye mu Kristo. Vindu yivi viosi, avalina vayanze vange, vikolwaa kunangwa munyi muduuki kwumbakwa.

²⁰ Mbeeye nu vuti ndi gase lwa ndakaaze yeyo, ndakanyoole nimuveeye lugano kutura kuli nyenya munyi muve. Na munyi hawundi mulanyola inzi nindaveeye kuli munyi muganaganaa. Mbeeye nu vuti ndi hawundi ndakanyoole ovolembani, embodoka, uvutima, iliavukana, uvwimani, limonyana, lielora kandi ikivihiri niviveeye hagati hinyu.

²¹ Mbeeye nu vuti ndi lwa nanzizi yaho ing'inga yiza, Nyasaye wange alakandeganyie imbiri winyu, na ndakasiome kigira vunyingi vwa yavo avaakoraa vwoni mu madiku gaavita, navuzwa sivayiganira vindu vidamanu kandi vwoni vwosi vwo voheyi vwa vaakora mba.