2 Vakorintho 11 - KITABU KITAKATIFU

¹ Ndakayanzi mwikuziri ninzi kali niiva mbeeye musiru. Mwaza yikuziri.

² Mbeeye nilikayilwa ni munyi kuli Nyasaye aveeye nilikayilwa ni munyi. Munyi muveeye kuli mukaana mugima, mulahi wa ndateevera umusaza mulala vuzwa, naye ni Kristo.

³ Navuzwa mbeeye nu vuti ndi, kuli enzoka ku vogeri vwayo vwo vovehi yagada Hawa, zing'anagani zienyu zinyala kogotizwa na muleke uvusuuvirifu kandi liehaana lienyu lia giligali ku Kristo.

⁴ Munyi muvugiliraa nu vusangali umundu woosi uzaa ku munyi kandi yilwaza Yeso oveeye lugano, utali wa kunyi kwilwaza; kandi muvugiliraa roho ni Ivangeri eveeye lugano ligali kutura ku Roho ni Ivangeri ya mwanyoola kutura ku kunyi.

⁵ Sing'anagana mbeeye mukekeeke kandi wa haasi kuvita yava ava munyi mulangaa, “Avatumwa vinyu vaduukiru” mba.

⁶ Kali nindaveeye umumolomi umulahi navuzwa mu limanya simbeeye ndio mba; kunyi kumali kumwivaalira likuva yili zing'inga ziosi kandi mu liiva liosi.

⁷ Ndilwaza ku munyi Ivangeri ya Nyasaye yo vohonyi vugira konyoora mitungu kutura ku munyi. Ndeegehiza umwene kunangwa muduuki konenehizwa. Ndaakola vudamanu, mu makuva yaga?

⁸ Lwa nda kola miyinzi hagati hinyu, ndaatungwa na makanisa gandi. Ndavanuulaa kunangwa nduuki kumukoonya.

⁹ Lwa ndaali harara ni munyi nokogehera vindu, sindamunyangiza kigira vokonyi lwa ndaali nilienya mabese mba; avaamitu vaatura Makedonia vandetera viosi via ndaali ningeheywe. Kuli mu maziambiri kandi mu madiku gaaza: Sindava musigo kumunyi kandi mba.

¹⁰ Kuli giligali ga Kristo agaveeye mu inzi, sihaveeye ho nu mundu unyala kungaya muliekonya yili mu kivala choosi cha Akaya mba.

¹¹ Mboraa yaga kigira ndamuyaanza kandi Nyasaye yamanya ndi ndamuyaanza!

¹² Ndazizagilira kokora aga ngolaa kalunu, nduuki kwigalira “avatumwa” vandi yavo vavuli kuva ni kivuni chu kwekonyera ku, mu livoora ndi vakora miyinzi kuli kunyi kokoraa.

¹³ Avandu kuli yava vaveeye avatumwa vovovehi; avatumwa vuvugadi avigirung'anyia veene valoreke kuli avatumwa viligali va Kristo.

¹⁴ Sigaveeye gokogenyia kandi, kigira kali Setani yigirung'anyia umwene ave kuli engelosi yu vulavu!

¹⁵ Kunangwa sikeveeye kindu chokogenyia niiva avatumikiri veve viigirung'anyia aveene vave kuli avatumikiri vu vulungi. Mu keheri, yavo valanyora amaduywa kolondekana ni vikolwa viavo vidamanu.

Vusaliri vwa Paolo kuli mutumwa

¹⁶ Nziraniraa kandi kovora ndi, mundu mulala ataganagana kuva mbeeye ligali musiru mba. Navuzwa kali niiva muganaganaa kuli ndio, muvugiliri inzi kuli musiru, kunangwa nduuki kuva nichukwekonyera ku.

¹⁷ Icha mboraa kalunu simbolaa nu vunyali kutura ku Mwami mba, navuzwa mu makuva gi liekonya yili, molomaa kuli mundu musiru.

¹⁸ Kigira avanyingi vekonyera ku vindu vie kivala, inzi kandi ndekonya kuli ndio.

¹⁹ Munyi mwikuziraa nu vusangali ku vasiru, kigira veene muveeye vageri ligali!

²⁰ Kigira mwikuziraa, kali mundu naamukora kuli vatugwa anoho mundu naamukora ululiiru, anoho naamulanga no vogeri vwu vugadi, niyenenehiza naamwaala izingovi.

²¹ Mbeeye soni kovora ndi kunyi kwaali avadedekere ligali kokora vindu yivio! Navuzwa niiva umundu woosi aluvilira kwekonyera kindu choosi, inzi molomaa kuli musiru kandi nduviliraa kwekonyera ku kindu yicho

²² Yavo ni Avaheburaina? Kali inzi mbeeye. Vaveeye avandu va Isiraeli? Kali mbeeye. Vaveeye avandu va Isiraeli? Ku inzi mbeeye. Vaveeye visukululwi via Aburahamu? Kali inzi mbeeye.

²³ Yavo vaveeye avatumikiri va Kristo? Inzi mbeeye mutumikiri mulahi wa Kristo ligali kuvavita; mboraa yaga kuli umulalu. Mali kuyinzira vudinyu ligali mali kuvikwa mu vuhambe haali kanyingi. Mali kukuywa haali kanyingi ligali, kandi mali kuva ahimbi ku likuza vuli ing'inga.

²⁴ Haali katano ndakuywa vivogo salasini na tisa na Avayuda.

²⁵ Ndakuywa ni zimbimbu haali kavaga na Varoma; ndalaswa na magina lulala; iliato liavunika haali kavaga munyanza; ndaali munyanza mu vudiku vwosi nu mbasu gwosi.

²⁶ Haali kanyingi mu zing'endo ziange, ndanyoora uvudinyu vwu kwambuka migera nijizuyi, vudinyu vwa vanuuri, vudinyu kutura ku Vayuda vudinyu kutura ku vandu vi Zihiiri zindi, vudinyu kutura mu madaala, vudinyu vwu mwigendanyama, kandi vudinyu kutura ku vaamitu vovovehi!

²⁷ Ndaakola miyinzi mu vunyang'ani; ndaminika haali kanyingi vugira zindoolo; ndaali ninzara nu vuluhu; haali kanyingi ndaaviikwa muvuhambe nokomenya mu vukindu vugira zinguvu.

²⁸ Vugira kovora vindu vindi, vuli lidiku mbeeye ni liminika kigira lihendera mwoyo amakanisa goosi.

²⁹ Lwu mundu woosi aveeye mudedekere mu lisuuvira, inzi kandi mbeeye mudedekere; lwu mundu woosi akolaa vwoni, inzi kandi mbezaa ni lihenda mwoyo.

³⁰ Niiva gaduukanaa nzekonye, ndekonya kigira vodedekere vwange.

³¹ Nyasaye Baba wu Mwami Yeso Kristo, amanyi ndi simbehaa mba, lieta lilie lizominywi mihiga ni mihiga.

³² Lwa ndaali mu lidaala lia Damasiko, mwamihi wi lidaala, waali hasi hu Mwami Areta, yavika avasikari ha virivwa vie lidaala linene lia Damasiko vaduuki kung'umira.

³³ Navuzwa ndiikizirwa mu kihinda kenene kuvitira mu lidirisia, mwidigi, ninziruka kutura mu makono gaavo.