2 Vakorintho 10 - KITABU KITAKATIFU

¹ Inzi, Paolo, ovolwa kuva muhocha kandi umwegehizu nimbeeye harara ni munyi moni na moni, navuzwa mululu papapa lwa mbeeye ihale kutura ku munyi, ng'oonya munyi ligali nu mwoyo gwosi, ku vohocha novohooma vwa Kristo!

² Mugoonyaa ligali ndi mutangola mbe mululu lwanduuka yaho ku munyi mba. Manyi vulahi ndi nyara kuva mululu ku vandu valala vavoola ndi ngola vindu kuturana ku lienya lie kivala yiki.

³ Gaveeye agiligali ndi komenyi mu lirova, navuzwa sikulwaanaa uvulwani kuturana ku lienya lie lirova mba.

⁴ Iviugi via kutumikira mu vulwani vwitu siviveeye kuli viugi vie lirova yili, navuzwa viugi vie zinguru zia Nyasaye via kutumikira kandi kwononyia zimbinga zindinyu zia vasigu.

⁵ Kwononyia amahangari kandi chukwikigitaliza chukwekonyera ku choosi chaviikwaho kuhing'ana ni limanya lia Nyasaye, kandi kuvugura zing'anagani ziosi nu kuzikola kutia Kristo.

⁶ Kwetegeki kuhaana amageri ku woosi uvula kuhulira, lwi liitia lienyu liiva niliakatwekizwa.

⁷ Munyi muheezaa vuzwa ku ligondo lie ichova wi vindu. Mundu ku vosi niyiganagana umwene kuva aveeye muduukiru umutumikiri wa Kristo, gamudukira yiganagane umwene kigira kuli oyo aveeye wa Kristo, kunyi kandi koveeye ndio.

⁸ Simbeeye soni, kali niiva inzi mali kwekonya mbitilira ku vunyali vwu Mwami yaaha kunyi, vwu kwumbaka munyi, kandi vutaveeye vwu kutandura nu kwononyia munyi, inzi sindava soni mba.

⁹ Sinyenyaa munyi muganagane inzi ngerizaa kumutiihiza ni zibarwa ziange mba.

¹⁰ Kigira vavoola, “Zibarwa zia Paolo ziveeye ni zinguru, navuzwa mwene lwaveeza harara ni kunyi aveeye mudedekere mu muviri, kandi limoloma lilie siliveeye kindu mba.”

¹¹ Gaduukiraa avandu vu lugano yilu vamanyirize ndi aga kovora mu zibarwa lwa kutaveeye ho, nigo ga kokoraa lwa koveeye ho ni munyi.

¹² Agiligali, kunyi sikunyala kuluvilira kwivika aveene anoho kweleng'anyia ku yavo vekola aveene kuva vaveeye avi igulu mba. Vaveeye vasiru ligali! Velombera vigero viavo veene kwegerera aveene naveene, kandi viikalagira veene ku liegera liavo veene!

¹³ Navuzwa kunyi sikunyala kwekonya kuvita kegero chietu mba, navuzwa liekonya lietu lilava vuzwa kuli lwako lwe kegero cha Nyasaye yakuha; kandi munyi muveeye mu kegero chi miyinzi jietu hagati hinyu.

¹⁴ Kigira munyi muveeye mu zinzako zia Nyasaye yavika ho ku kunyi, sikwasiira zinzako yizio lwa kwazia Korinzo mba. Kwaali avukutanga kuuza ku munyi nikoleetaa Ivangeri ya Kristo.

¹⁵ Kunangwa, sikwekonyaa kigira miyinzi ja vandu vandi vamala kokora kuvita kegero cha Nyasaye yakuha mba. Navuzwa lisuuvirizwa lietu liveeye ndi, kuli lisuuvira lienyu linenehaa, lwako lwu vuyinziri vwitu hagati hinyu luduuki konenehizwa ligali kolondekana ne kegero cha Nyasaye yaviikaho.

¹⁶ Gaveeye ndio kunangwa kunyi kuduuki kwilwaza Ivangeri ya Nyasaye muvivala vindi, ihale kutura ku munyi, ku kuvuli kwekonya kigira miyinzi ja vandu vandi vamali kokora havundu handi.

¹⁷ Navuzwa kuli Mang'oda Matakatifu gavoora, “Ku vosi wenyaa kwekonya, gaduukanaa yekonyere agu Mwami amali kokora.”

¹⁸ Kigira siaveeye umundu uyu wekonyaa mwene uvugilirwa, navuzwa uyu wu Mwami mwene yekonyeraa.